Ugubhe olokuzalwa ngokusungula inhlangano ezosiza abahlwempu
UMashimane onamabhizinisi ahlukene uthi ufisa nabanye baphonse kule nhlangano ngoba baningi abantu abadinga usizo
Ekhuluma ngokukhethekile ne
uMaphumulo owaziwa ngamatekisi abhalwe ukuthi Slow Poison embonini yamatekisi, uveze ukuthi uzizwa ethobeka enhliziyweni ukuthi ukusiza kwakhe umphakathi sekuzokwenzeka ngendlela esemthethweni.
“Ukusiza kwami abantu, yinto osekuneminyaka ngiyenza futhi bengijwayele ukunganaki futhi ngingabali. Lana kwami kuhlale kufika abantu benezinkinga ezahlukene. Ngenxa yokuthi ngiyathinteka njalo uma ngibona umuntu esenkingeni, ngivamise ukusiza nami,” kusho yena.
Uthi okwenza athinteke kakhulu wukuthi naye akakhulanga emndenini obume kahle, yingakho ezwela uma kukhona umuntu okhalayo, efuna usizo kuyena.
UTHI LINCANE INANI LESIKHWAMA UMA EQHATHANISA NEZINKINGA ZABANTU
Uthe nakuba inani lalesi sikhwama libukeka lilikhulu kodwa empeleni lincane uma ubheka izinkinga abantu abakhelene naye nalabo azimisele ukubasiza.
“U-R1 million akuyona imali enkulu, uma ungase ubone izinkinga zabantu nokuthi sizimisele ngani. Ngokwami le mali ibingaba ngaphezulu, kodwa ke iwona amandla ebengisenawo okwamanje,” kusho yena.
Uveze ukuthi njengomuntu osesebenze nenqwaba yamabhizinisi, nabanye osomabhizinisi uzobanxenxa ukuthi nabo baphose kulesi sikhwama.
“Ngizobonisana nozakwethu esisemabhizinisini nabo, sibone ukuthi bona bangaphosa kanjani esivivaneni kusona lesi sikhwama ukuze si-kwazi ukusiza inqwaba yabantu,” kusho uMaphumulo eveza ukuthi ezinye zezinkinga ahlangabezana nazo ziyamdida njengoba emane engazi ukuthi kungani abantu bekhetha ukuya kuyena.
“Uyabona nje sengamukela ukuthi ezinye izinkinga ngizozixazulula nakuba zingangithinti njengoba ezinye zithinta imimndeni engahlangene nami,”esho. Uthe nakuba engusomabhizinisi ophumelele kodwa zikhona izingqinamba ahlangabezana nazo ikakhulukazi embonini yamatekisi. “Kuyiphupho lami ukuthi ngelinye ilanga sibe nemboni yamatekisi enokuthula ngaphandle kwezinkinga esihlale sizwa ngazo, kubuye nesithunzi sokuba sebhizinisini lamatekisi.
“Ezinye zezinto ezenzeka kule mboni ziyasithunaza isithunzi semboni, ikakhulukazi uma kungahlonishwana, nemithetho ebekiwe ingalandelwa,” kusho uMaphumulo oqhoqhobele isikhundla sokuba nguSihlalo weZamo-kuhle Long Distance Taxi Association ezinze ePort Shepstone.
Uveze ukuthi esikhathini esingangonyaka ekulesi sikhundla, usekwazile ukuthi asungule ihhovisi elisezingeni lalo soseshini njengoba selokhu waba khona ubungakaze ube nehhovisi.