Zisathuka izanya izingane ezabona uyise ebulala unina
Kuthiwa umsolwa ubonakala kwi-video efuna ukugwaza owayelamulela isisulu
KUVUKE umunyu enkantolo ngoLwesihlanu kumalungu omndeni kamufi, ngesikhathi umyeni wakhe osolwa ngokumbonda ngommese phambi kwezingane zabo, efaka isicelo sebheyili.
UMnu Mhlengi Ndaba (45) ubevele eNkantolo yeMantshi eThekwini ngecala lokubulala uNkz Dima Phohlo (31) obeyingoduso yakhe, esigamekweni esenzeke emasontweni amabili edlule.
Kubikwa ukuthi laba bebehlala eMorningside, eThekwini ngesikhathi kuqubuka ingxabano phakathi kwabo. Kuthiwa ngosuku lwesigameko uNdaba waba nengxabano nomufi, eyaholela ekutheni amgwaze ephindelela, kwala ngisho umufi esebalekela emgwaqweni eyofuna usizo, wamlandela wamgwazela khona.
Kuthiwa kune-video eveza uNdaba egwaza ebulala ingoduso yakhe, kubuka nezingane, eyaqoshwa yiCCTV yalapho behlala khona.
Enkantolo bekugcwele amalungu omndeni nabebeyokweseka umndeni kamufi.
Ummeli kaNdaba uMnu J Naidoo, ucelele ikilayenti lakhe ibheyili. Uthe liyaliphika icala lokubulala, lithi lalizivikela kumufi, owayelihlasela ngebhodlela.
Uthe ngosuku lwesigameko ikilayenti lakhe, lafika endaweni abebehlala kuyo kwasuka ingxabano phakathi kwabo, umufi engazenzele ukudla izingane zabo, lokho kwaholela ekutheni baxabane. Uthe ikilayenti lakhe ngeke likubalekele ukuqulwa kwecala, ngoba linenkampani nezisebenzi eliziqashile. Uthe linezingane ezine okubalwa nezikamufi okumele lizondle njengoba zibheke lona lodwa, futhi ngeke libe yingozi kofakazi kuleli cala kanti lizimisele ukuba lisuke eThekwini liyohlala kubo eGroutville.
UMshushisi uMnu Calvin Govender, uthe umbuso uzosebenzisa ubufakazi obaqoshwa yiCCTV, obukhombisa uNdaba egwaza umufi ephindelela phambi kwezingane zabo, yize ebeselele phansi.
Kule video, umufi uyabonakala ephuma ebaleka endlini yabo, uNdaba emlandela emgwaza. Uthi kubonakala nowayebuka kwenzeka lesi sigameko, ezama ukulamula, kodwa uNdaba uyabonakala efuna ukumgwaza (owayelamula).
Uveze ukuthi umphenyi wecala ngesikhathi efika endaweni yesigameko, wathola imimese emithathu endlini, yonke igcwele igazi.
Uthe kuyaxaka ukuthi uNdaba uthi wayezivikela ekubeni okuqoshwe yiCCTV kukhombisa umufi ephuma endlini yabo ebaleka eya emgwaqweni, uNdaba emlandela afike amgwaze ephindela yize wayeselele phansi, kubuka izingane zabo ezimbili.
Uthi kuyaxaka ukuthi esicelweni sakhe uthi uzikhathalele izingane zakhe, uma kunjalo ngabe akazange akwenze lokhu zibuka.
Uphinde waveza ukuthi amacala ahlanganisa udlame olubhekiswe kwabesifazane nezingane yinto esiyinsakavukela umchilo wesidwaba. Uthi kumele inkantolo icabangele ofakazi okubalwa kubona umasitende owanikeza amaphoyisa isithombemnyakazo (video) esaqoshwa yiCCTV.
Uthi kumele kucatshangelwe nofakazi ababona kwenzeka lesi sigameko okubalwa nalona owazama ukulamula.
IMantshi uMnu Manjezi (elingatholakalanga igama layo) ibe isiyalela ukuba icala lihlehliselwe uLwesihlanu.
UNkz Makgetho Phohlo ongunina kamufi, uthi kuyamkhathaza ukuthi umkhwenyana wakwakhe akakhombisi ukuzisola ngento ayenza. Uthi namanje kusenzima ukudlulisa into eyenzeka.
“Abazukulu bami ababona kwenzeka le nto namanje basathuka, omunye uyasho ngisho ukusho ukuthi ubaba wakhe wabulala umama wakhe,” kusho yena.