Impi ye-Israel nePalestine ikuveza obala ukuchema kwelakuleli
LISUNGULWE NGOWE-1903
NGOKUJWAYELEKILE, akukho okutheni okubabazekayo uMnyango wezaNgaphandle wakuleli odume ngakho, kodwa kulezi zinsuku izikhulu noNgqongqoshe wawo uNkk Naledi Pandor sebezakhele udumo, basha amashushu, bakhwela bayadilika kuhulumeni wakwa-Israel ngokuhlasela kwawo eGaza. Uhulumeni wakwa-Israel ugasele kule ndawo emuva kokuba ababusi baseGaza, iHamas, behlasele amaJuda kwa-Israel, babulala izakhamizi ezibalelwa ku-1 400, bathumba ezingaphezulu kuka-200.
Uziphindiselela ngokuhlaselwa kwezakhamizi zawo, uhulumeni wakwa-Israel ugasele ngamasosha eGaza, lapho sekufe khona abantu abangaphezulu kuka-10 000 wezakhamizi zakule ndawo.
Okuqaphelekayo wukuthi uhulumeni wakuleli, ojwayele ukungasho lutho olukhumbulekayo uma kunezimpi kwamanye amazwe kulokhu kawunasinqe, ugxeka uhulumeni wakwa-Israel ngokuziphindiselela, uthi ubulala abantu abangenacala eGaza.
Isibonelo sokungabi namgogodla kukahulumeni wakuleli wukucasha ngesithupha kwawo odabeni lokuhlaselwa kwe-Ukraine yiRussia, lapho (uhulumeni) uhlale uthi kawuthathi hlangothi kule mpi, naphezu kokuba kubona ngisho ingane ukuthi ngezenzo zawo ucheme isidana namaRashiya, angaconsi phansi eqenjini elibusayo nabalandeli balo.
Odabeni lwe-Israel nePalestine, uhulumeni we-ANC kade waluthatha uhlangothi, njengoba eminyakeni edlule waze wahoxisa inxusa lawo kwa-Israel. Kunomkhankaso oqhubekayo ngaphakathi kuKhongolose wokuxosha inxusa lakwa-Israel elizinze kuleli, nokuqeda ubudlelwano bokuhwebelana kwezomnotho phakathi kwala mazwe.
Njengenjwayelo, uhulumeni ulokhu ugudla iguma kunokuba uphumele obala ngokuhlosile.
Kanjalo nasodabeni lwempi ephakathi kweRussia ne-Ukraine, kuyaxaka ukuthi kungani lo hulumeni ungaphumeli obala, utshele umhlaba wonke ukuthi uyahambisana nesinyathelo seRussia sokuhlasela amanye amazwe azimele, idle umhlaba wawo ngezikhali.
Kungaba kuhle futhi ukuthi lo hulumeni unqamule ubudlelwano baleli nawo wonke amazwe ayizikhondlakhondla asentshonalanga njengeMelika, iNgilandi, iJalimane namanye, ugxile ekukhuliseni uhwebo nabangani bakaKhongolose iRussia, China, North Korea ne-Iran, ukubala nje ambalwa.
Kuyamangaza ukuthi amazwe asentshonalanga anesigcwagcwa kulo hulumeni, naphezu kokuba kuyiwona abantu abaningi bakuleli abaphila ngawo, njengoba enezimboni ezikuleli eziqashe izinkulungwane zabantu, abondla imindeni yabo ngokuqashwa yizinkampani ezasungulwa ngosozimboni bala mazwe.
Ukucabanga kwezikhulu zethu kuyaxaka ngoba okuphambili kuzona wubungani bazo nabafo bakwamanye amazwe, hhayi izinto ezibalulekile ekusimameni komnotho wezwe nenhlalakahle yezakhamizi zakuleli.