Uyaziqhenya ngokulanda umqeqeshi onohlonzo
IBaroka iyashoshela kwiMFC selokhu iqashe uMalesela
UNCOMA isinqumo asithatha sokulanda umqeqeshi onamagalelo aziwayo kwiPremier Soccer League, uKhurishi Mphahlele ongumnikazi weBaroka FC elokhu iqhubekile nokushoshela esicongweni seMotsepe Foundation Championship (MFC).
UMphahlele utshele ILANGA namanje uyaziqhenya ngesinqumo asithatha sokuqasha uDan “Dance” Malesela njengomlolongi wale kilabhu.
Uthi kuyamthokozisa ukubona izinto zibuyela esimeni njengoba sebebalwa namakilabhu asethubeni lokudla ubhedu kwiMFC okunikana igunya lokwenyukela kwiDStv Premiership. Uthe ujabule kakhulu ngokwenzekayo ekilabhini yakhe.
“Sekungcono kakhulu manje, izinto kazisefani nasekuqaleni kwesizini. Manje sengiyakwazi nokulala ubuthongo obumnandi ebusuku. Kube yisinqumo esihle ukulanda uMalesela, yingakho sibuye sabona kungcono ukuba simlandele nabadlali abanesipiliyoni ukumeseka,” esho.
Kubadlali abasanda kulandwa yiBaroka kukhona uTrevor Mathiane owake wayibamba kwiLamontville Golden Arrows odlala emuva noLehlohonolo Nonyane oyisitobha obedlala kwiMarumo Gallants ngesizini edlule. Uthi uyakuqonda ukuthi isizini iseyinde.
“Kepha uma abadlali bami beqhubeka nokwenza kahle singase sigcine sikwazile ukufeza iphupho lethu lokubuyela kwiPremiership.
“Sinzima kakhulu lesi sigaba, kufanele ukwazi ukumelana nengcindezi yaso,” kusho uMphahlele obephuphuma injabulo.
IBaroka iqumbe phansi i-Orbit College ngo-1-0 ngoMgqibelo koweMFC e-Olympia Park Stadium, eNorth West.
Igoli enqobe ngalo livalelwe enethini nguGerald Junior Phiri ngomzuzu ka-45.
* IMaritzburg United ibuye nephuzu elimqoka kwiNB La Masia - elolongwa nguDaine Klate - kuba ngu-0-0 koweMFC ngoLwesihlanu eDobsonville Stadium, eGermiston.
* Isiyonke imiphumela yeMFC imi kanje: Tuks 2, Platinum 1; Upington 1, Milford 0; Leopards 1, Venda 1; Lions 1, Magesi 3; Orbit 0, Baroka 1; Marumo 4, Callies 2; La Masia 0, PMB 0; JDR 2, Casric 2.