Usemkhulu umsebenzi osahlalele iChiefs
USEMKHULU umsebenzi osahlalele uCavin Johnson ongumqeqeshi weKaizer Chiefs eguqiswe yizimbangi zayo ezinkulu i-Orlando Pirates ngo-1-0 wegoli lika-Evidence Makgopa koweDStv Premiership ngoMgqibelo ntambama eFNB Stadium, eSoweto.
Lo mdlali ushaye leli goli nje, ubesenyamanambana kubalandeli bale kilabhu abebemsola ngokudlisela kweminye imidlalo.
Ekhuluma emuva kwalo mdlalo uJohnson, uvumile ukuthi kusekuningi okumele kwenziwe ngabadlali bakhe ukuze bafike kuleli zinga alifisayo.
“Bekuwumdlalo omuhle kuwona womabili amakilabhu.
“Ngikholwa wukuthi abalandeli bakuthokozelile abakubonile kulo mdlalo.
“Sibenethuba lokushaya igoli kuqala ngesiwombe sokuqala kodwa sashweba. Ngeshwa bona bakwazile ukusebenzisa ithuba abalitholile.
“Ngesiwombe sesibili sizamile ukubacindezela kodwa sehluleka ukugqobhoza udonga lwabo lwasemuva. Ngiyayibongela iPirates ngokunqoba, kodwa ngingakubeka kucace ukuthi sisazovuka sizithathe.
“Kangeneme ngendlela abadlali abadlale ngayo.
“Ngikholwa wukuthi kukhona abebengakwenza ukuba bebengaxhamazeli, bagcine bethatha izinqumo ezingalungile.
“Uma udlala usuxhamazela, aba mancane kakhulu amathuba okwenza okufanele, okuyikhona okusilimaze kakhulu kulo mdlalo,” kusho lo mqeqeshi obeqala ukuqhoqhobala izintambo kwiSoweto Derby.
Nakuba ekhuluma kanjena lo mqeqeshi, iqembu lakhe lisasalelwe wumsebenzi onzima kwazise likhombise ukuba nhlakanhlaka kulo mdlalo, lehluleka wukuhlanganisa amaphasi axoxa indaba, okuyinto eladuma ngayo phambilini.
Lo mqeqeshi ubuye wacacisa ngokukhishwa kukaKeagan Dolly ngesiwombe sokuqala, wathi kube ngenxa yokulimala. Indawo kaDolly ithathwe nguPule Mmodi.
Kuzokhumbuleka ukuthi womabili la makilabhu eze kulo mdlalo izinto ziwabhedela njengoba esendaweni angajwayele ukuba kuyona kwi-log.
Nokho ukugcwala phama kwenkundla kukhombisile ukuthi lo mdlalo wabakhaya kawukaphelelwa yisikhathi.
Lo mdlalo ubuhanjelwe nayizikhulu zeFifa okubalwa kuzona uGianni Infantino ongumengameli noPatrice Motsepe owengamele iCaf.
Laba baphinde bethamela ingqophamlando yomdlalo wamanqamu we-African Football League (AFL) obuphakathi kweMamelodi Sundowns neWydad Casablanca yaseMorocco obuyizolo ePitoli.