OWE-ACTION SA USELUDLULISELA KUBAMELI ELOKUNGAKHISHWA KOMBIKO "WENKOHLAKALO"
UVEZE ukuthi useqalile ukuxhumana nabameli bakhe ngodaba oluthinta umbiko weCity Integrity and Investigation Unit (CIIU) mayelana nesivumelwano sikaMasipala weTheku neNkosi Albert Luthuli International Convention Centre (ICC), uMnu Zwakele Mncwango, ofuna lo mbiko udedelwe kumakhansela ukuze awudingide, bese kuthathwa izinyathelo.
UMncwango ohola i-Action SA kulesi sifundazwe futhi ohola leli qembu emkhandlwini weTheku uthe uphenyo ngalesi sivumelwano seluphothuliwe, umbiko usudluliselwe nakusomlomo nemenenja kamasipala.
“Esikufunayo manje, wukuthi udluliselwe kithina makhansela nasemphakathini,” kusho yena.
Phambilini uMncwango waphumela obala, esola inkohlakalo phakathi kukaMasipala weTheku ne-ICC mayelana nengqungquthela ye-ANC Women's League, KwaZulu-Natal yokukhetha ubuholi eyabanjelwa kule ndawo ngoNcwaba (August). UMncwango waveza ukuthi usola inkohlakalo ngokuqashwa kwale ndawo njengoba isivumelwano esenziwa sasifaka uMasipala weTheku ekubeni wabe ungahlangene nayo.
Ngenxa yalezi zinsolo uMncwango ubabele kwiCIIU ukuze iphenye. Ngokusho kukaMncwango, lolu phenyo luphothuliwe ngeledlule, sekumele ludedelwe ukuze ludingidwe. “Okubuhlungu wukuthi abafuni ukudedela umbiko, yingakho sengiqoke ukuthi ngiqale ngibonisane nabameli ngenhloso yokuthi sithole ukwelulekwa ngezinyathelo okumele sizithathe uma singawutholi lo mbiko. “Okungikhathazayo wukuthi ngesikhathi ngiveza le nkohlakalo iqembu elibusayo langisola ngamanga nokuthanda ukubukwa, yingakho ngifuna iqiniso lihlale obala ngezinsolo engazenza,” kusho yena. USomlomo kaMasipala weTheku uMnu Thabani Nyawose ukuchithile okushiwo nguMncwango ngalo mbiko mayelana nokuthi usuphothuliwe. Uthe lo mbiko usasetshenzwa, kawukaphothulwa.