KWEHLE UMTHWALO NGOXHASO
KWEHLE umthwalo emahlombe omgijimi othole indondo yegolide eqala ukugijima iComrades Marathon nonyaka ngesikhathi ehlabana ngabaxhasi bakwaUnder Armour.
Laba baxhasi banike uJenet Mbele (osesithombeni) waseMzimkhulu izimpahla zokugqoka, ezokujima, amateki kanti uzohlomula nangama-bhonasi uma enze kahle emijahweni azobamba iqhaza kuyona, kubalwa ukudla ubhedu nokuphuma nabathathu bokuqala.
Lezi zindaba zijabulise kakhulu neXcel Running Club lo msubathi angaphansi kwayo. Le nkampani ixhase abagijimi abaningi emhlabeni.
UMandla Mngomezulu ongomunye wabaphathi beXcell, uthe: “Sijabule kakhulu ngoxhaso olutholwe nguJenet. Lokhu kusho lukhulu ekilabhini futhi lufike kahle njengoba sigubha iminyaka emithathu ikilabhu yasungulwa. Lezi yizinkomba zokuthi ikilabhu isendleleni ebheke phambili.
“Ngaphandle kwezinto zokugqoka, lolu xhaso luhambisana namabhonasi amahle kweminye imijaho lo msubathi okufanele abe yingxenye yayo. Umnotho wethu uyantengantenga ngakho ukuthola abaxhasi kukaJanet kuzomsiza kuphinde kusize nesifundazwe.”
Uma singene kwi-Excel, uMngomezulu uthe ikilabhu yabo ikhula ngesivinini.
“Le kilabhu siyivule ngesikhathi esibi, izwe liguqile ngenxa yokhuvethe. Bekunzima futhi namanje kusenzima. Kakulula ukuphatha ikilabhu uma ungenabo abaxhasi. Kumanje ikilabhu inabasubathi abangaphezulu kuka-300.
“Kuneziko esisanda kulivula eGauteng. Sinabasubathi abangaphansi kwekilabhu abasemazweni angomakhelwane. Kule minyaka emithathu ikilabhu yenze kahle. Sikwazile ukunqoba imijaho ewu78. Sibala nendondo yegolide etholwe nguJenet kwiComrades.
“Sinabasubathi abakwazile ukumela isifundazwe abanye bakwazi ukumela izwe emidlalweni eyahlukene. UJenet uphinde waqokelwa eqenjini lesizwe ebeligijima e-India kwi-IAU 50km. Ngikhuluma nje, sinabasubathi abenza isikhathi esiwu-28 kwi-10km, u-60:00 kwiHalf Marathon no-2:10 kwi-marathon.
“Namanje zisavuliwe izandla kwabafuna ukuphonsa esivivaneni ukuze siguqule impilo yentsha yakuleli,” kusho uMngomezulu osebenza ngokubambisana noSibusiso Cele nabanye kwiXcel.