Kubulawe ngesihluku induna ngabebezenza abafuna indawo
Nomfowabo obeyinyanga eyaduma ngokucupha inqunu wabulawa ngendlela efanayo ‘ngababezofuna’ usizo
UTHUKA izanya umndeni wenduna edutshulwe yabulawa ngaphandle komuzi wayo eMandeni, ngabantu abafike bazenza abazofuna indawo.
UMnu Vela Shandu (54) obeyinduna ezigodini ezintathu eMandeni, kubikwa ukuthi ubulawe ngabantu abangaziwa, abebezenza abafuna indawo. UShandu ubeyinduna eMhlangeni, eNdlondlo naseManda Farm.
Ubulawa nje, awukapheli unyaka kudutshulwe kwabulawa umfowabo uMnu Solomon Shandu, obeyinyanga eyayidume ngokucupha amathuna inqunu.
Nenyanga yadutshulwa ngabantu abafika bazenza abadinga usizo lokwelashwa, okuthe sebesesigodlweni nayo, bayidubula yashona.
Kuthiwa ngoLwesibili, ababulali bafike ngezithuba zasekuseni, bafuna induna. Kuthiwa ngaphambi kokuba bayidubule, baqale baxoxa nayo behleli egcekeni, kuthe isiphuma nabo ngaphandle kwesango lomuzi, bayidubula amahlandla amathathu.
ILANGA lihambele umndeni wakwaShandu ngawo uLwesibili, egcekeni bekugcwele abantu beyobhonga emswanini.
Ilungu lomndeni elikhulume naleli phephandaba elingeke lidalulwe ukulivikela, lithe basadidekile ukuthi boneni njengoba sekudutshulwe elinye ilungu lomndeni.
Lithi yize bengazi ukuthi ubulawelweni, kodwa bayasola ukuthi kuhlobene nokubulawa kukamfowabo, naye obulawe ngendlela efanayo.
“Laba bantu kabaqali ukufika. Phambilini bazibiza ngokuthi ngabakwaShandu, eShowe, bafuna indawo. Lokhu kufakazelwa wukuthi ngesikhathi sebengenisiwe egcekeni, induna ikhombise ukungabaxwayi,” kusho leli lungu.
Lithe bayasola ukuthi ababulali imoto ibibalinde eduzane ngoba kuke kwabonakala imoto yohlobo lwePolo imile eduzane nomuzi wenduna.
Lithi ababulali badubule induna maqede bazihambela ngezinyawo, imoto idlule ngesivinini iyocosha bona ababulali.
“Okwenza sidideke kakhulu wukuthi phambilini uke waveza ukuthi kunabathile abangeneme ngodaba lokuthi uphethe izigodi ezintathu. Wakusho lokhu ekhathazekile. Kasazi noma nalokho kuyimbangela yokubulawa yini,” kusho ilungu lomndeni.
UMnu Simphiwe Mdunge oyikhansela kule ndawo uthe bashaqekile ngokubulawa kwenduna ngendlela ethi mayifane nokubulawa kukamfowabo.
“UShandu besisebenza kakhulu naye ekulweni nobugebengu njengoba ubeyingxenye yeForum endaweni,” kusho ikhansela.
Okhulumela amaphoyisa KwaZulu-Natal, uConst Thenjiswa Ngcobo, uthe kuvulwe icala lokubulala. Amaphoyisa asaphenya.