Izinyembezi inkosikazi ivalelisa ku-principal obhekene necala
Imoto nesibhamu okwabulawa ngaso iphoyisa, 'kwatholakala emzini wakhe'
IQONDE ngqo kubaphenyi becala lokubulawa kwephoyisa likaMasipala eMlazi inkosikazi kathishanhloko ongomunye wabasolwa, ifuna ukuba bayichazele kabanzi ukuthi yini ehlanganisa umyeni wayo necala. Lokhu kwenzeke emuva kokuba icala lihlehlisiwe.
UNkk Faith Nongcebo Ntombela oyinkosikazi kamufi, uKhulani Cele - odonsa isigwebo sikadilikajele ngecala lokubulala ikhasela - noMnu Sthembiso Khumalo (53), onguthishanhloko eMphumlana Primary School KwaMaphumulo, bebevele eNkantolo yeMantshi yaseMlazi NgoMsombuluko. Babhekene necala lokubulala uCapt Thomas Ntombela, owadutshulwa wabulawa esemzini wakhe eMlazi ngoNhlaba (May).
UMzokhono Ntombela, oyinkabi eyabulala umufi, walivuma icala, wagixabezwa iminyaka ewu-20 ebhadla ejele. Emuva kwalokho, waveza ukuthi wayethunywe ngubani.
NgoLwesihlanu, oKlebe bashaqe uKhumalo esemzini wakhe. Bekungokokuqala evele enkantolo ngoMsombuluko. Inkosikazi kaKhumalo ihlulekile wukuzibamba ngesikhathi esevele enkantolo, yachiphiza izinyembezi.
Kuthe sekuphunywa enkantolo - icala selihlehlile - wabonakala eqonda kubaphenyi becala, wabapheka ngemibuzo.
Kuthe kusenjalo, waqhamuka uKhumalo emhubheni ephuma enkantolo - eqhutshwa ngoKlebe eboshwe izadla - eyongena emotweni yabo, ebuyiselwa ezitokisini.
Bamnike ithuba lokuvalelisa, wamanga umkakhe echiphiza izinyembezi.
Akubange kusahamba ngezifiso zommeli kaNkk Ntombela, uMnu Ashwin Rughbeer, njengoba bekulindeleke ukuba ikilayenti lakhe lifake isicelo sebheyili. Lokhu kuphazanyiswe wukuboshwa kukaKhumalo, umshushisi waveza ukuthi kumele isicelo sebheyili basifake ngesikhathi esisodwa, uNkk Ntombela noKhumalo.
Icala lihlehliselwe uLwesithathu, lapho kuzolalelwa khona isicelo sebheyili kaNkk Ntombela noKhumalo.
ILANGA libike kabanzi ngoMsombuluko ngokuboshwa kukaKhumalo njengoba kuvele ukuthi isibhamu esabulala uCapt Ntombela, yimoto kamufi, nesibhamu sakhe somsebenzi, kwatholwa emzini wakhe.