SELUQALIWE UHLELO LOKUQAMBA KABUSHA I-LADYSMITH
KUYAPHELA ngegama ledolobha iLadysmith njengoba seluqalile uhlelo lokuba libizwe ngokuthi wuMnambithi ngokusemthethweni.
Leli gama abanye bese beqalile ukulisebenzisa yize lokhu bekungekho emthethweni njengoba belingashicileliwe emabhukwini kahulumeni.
ILANGA lithole ukuthi nakuba sesikhona isiphakamiso segama “uMnambithi” kodwa kungase kube nokuphazamiseka ngalokhu njengoba kukhona indawo ese-Eastern Cape eqanjwe ngalo.
Kulindelwe ukuba umphakathi unikezwe ithuba lokuphakamisa amagama leli dolobha ofuna liqanjwe ngalo, bese kuqala uhlelo lokuvota.
Igama elithi “Mnambithi” ngokwamabhuku omlando, kuvela ukuthi lisuselwa emfuleni iKlip River, owachazwa njengowabe unamanzi anambithekayo.
Elithi “Ladysmith” lona lisuselwa kuNkk kaHarry Smith owayehola umbutho wamaNgisi ezimpini ezehlukene.
UNgqongqoshe woMnyango wezobuCiko namaSiko KwaZulu Natal, uDkt Ntuthuko Mahlaba, unxuse umphakathi ongaphansi kukaMasipala Alfred Duma ukuba ulisebenzise ithuba lokuvotela ukushintshwa kwegama laleli dolobha.
Uthe okwamanje mabili amagama akhona angavotelwa, okuyileli elikhona iLadysmith naleli elithi “Mnambithi”.
Ungqongqoshe uthe umphakathi uvumelekile ukunezela ngelinye igama uma ubona kufanele, kodwa kakumele kube yigama eselikhona noma elithunaza isithunzi.
Kuqala ngoMsombuluko mhla ka-27 kwephezulu kuvalwe mhla ka-1 kuZibandlela (December) ukuphakamisa nokuvotelwa kwegama laleli dolobha.
Umphakathi unxuswa ukuba usebenzise ilungelo lawo ngokuya eLadysmith Town Hall nasezinkantolo zamakhosi ezingaphansi kwalo masipala.
Khonamanjalo, kulindelwe ukuba lwethulwe ngokusemthethweni kusasa ngoLwesihlanu igama ledolobha iPemoroy elingaphansi kukaMasipala waseMsinga njengoba selizobizwa ngeSolomon Linda.
USolomon wabe engumculi wesicathamiya owabhala ingoma yodumo esihloko sithi Mbube, eyaduma isiculwa yiLadysmith Black Mambazo.
Lo mcimbi uzolandelwa ngowangoMgqibelo wesicathamiya ozobe unoswenka bonobuhle ukuhlonipha le nkakha.