Ubalisa ngamabhadi umqeqeshi wePirates
Uthi kakuyifanele ukuvika izembe iRichards Bay FC ngenxa yengcwenga eyidlalayo
UBALISE ngokulandelwa ngamashwa uJose Riveiro ongumqeqeshi weOrlando Pirates ecazelane amaphuzu neRichards Bay FC kuba wu-0-0 koweDStv Premiership ngoMgqibelo ntambama eKing Zwelithini Stadium, eMlazi.
Lo mqeqeshi uthi ezakhe kazinayo inhlanhla kulezi zinsuku. Uthi bebewafuna egcwele amaphuzu kwiBay kodwa bagcina bethole elilodwa.
“Bawuqale kahle umdlalo, ngicabanga ukuthi imizuzu yokuqala ewu-20 bebedlala kahle kodwa bebengafiki emapalini ethu. Kasizange siqale kahle size saqala ukuba ngcono ngokwenyukela kwesiwombe sokuqala.
“Ngesiwombe sesibili umdlalo bewuthwele yithina sonke (isiwombe) kodwa sehluleka wukukora emuva kwenqwaba yamathuba esiwakhile. Siyiqembu elinebhadi emhlabeni.
“Kakusiwona umdlalo obekufanele sibuye nephuzu kuwona lona kodwa kakukho esingakwenza kufanele silithathe leli phuzu. Silahle amaphuzu amabili kulo mdlalo kodwa kusasele awu15 okufanele siwadlalele ngaphambi kokuba kuvalelwe uKhisimusi.
“Kuzofanele sizame ukuqoqa amaphuzu azokwenza siye emaholidini sijabule,” esho.
Uthi kuzofanele bayisebenze eyokushweba amathuba ngoba uma bengakori ngeke bayinqobe imidlalo, bazolokhu belahla amaphuzu njengoba kwenzeke kulo mdlalo weBay.
Akawuvali umlomo ngoYonela Mbuthuma ongumgadli weBay, nangendlela le kilabhu edlala ngayo.
“Bayagijima, bayalwa, kukhona konke abakwenzayo bayalekelelana. Lo mfana wabo ogqoka ijezi unombolo-9 ungigeze igilo, uyagijima ngicabanga ukuthi kulo mdlalo ugijime amakhilomitha awu-20.
“Bayikilabhu oncintisanayo nayo, ongeke uyizele ngobuso ngoba nakhu uyiPirates. Kuyethusa ukuthi bakule ndawo abakuyo uma ubuka indlela abadlala ngayo,” esho.