UMQEQESHI WE-RICHARDS BAY FC UCACISA NGOBUDLELWANO NE-SENIOR
UCACISA ngobudlelwano anabo noVusumuzi “Kanu” Vilakazi osanda kuqashwa ukuzokuba yi-senior coach kwiRichards Bay FC umqeqeshi wale kilabhu uKaitano Tembo.
IBay ibambane ne-Orlando Pirates ngo0-0 koweDStv Premiership ngoMgqibelo ntambama eKing Zwelithini Stadium, eMlazi. IBay igijime lo mdlalo isanda kumemezela uVilakazi njengomqeqeshi wayo omkhulu. Uqashwa nje, ulaxaze iChippa United abesahlale izinyanga ezimbili kuyona engusomaqhinga.
Ibimuthathe emuva kokuba esule kwiLamontville Golden Arrows lapho abebambisene khona noMabhuti Khenyeza esigqikini sokuqeqesha. UVilakazi ubonakale okokuqala ngqa ebhentshini leBay ibhekene neBucs.
UTembo ekhuluma nabezindaba emuva kwalo mdlalo weBucs, ucacise ngobudlelwano bakhe noVilakazi nangokubaluleka kokuba khona kwakhe.
“Emhlabeni wonke jikelele kumqoka ukuthi ube nomuntu ozokwazi ukuncika kuyena uma ufuna ulwazi. Lokho kuyasiza ngoba lowo muntu ubona izinto ngendlela ehlukile okuyile nto elethwa nguKanu. Sisebenza kahle ndawonye futhi nobudlelwano bethu buhle, ngethemba ukuthi sizoqhubeka ngale ndlela. Siyamamukela ethimbeni labaqeqeshi,” kusho uTembo.
Uthi abafana bakhe balwile kulo mdlalo weBucs, bakhombise isibindi.
“Siwuqale kahle umdlalo ikakhulukazi ngesikhathi unemizuzu ewu-15 kuya kwewu-20 uqalile. Inhloso bekuwukuthi singabaniki isikhala sokudlala nokuthi ibhola lingahlali ngakubo. Besazi ukuthi uma sike sabadedela bazokuba yinkinga. Siwatholile amathuba ebesingakora ngawo kodwa senza izinqumo ezingezinhle.
“Basicindezele saphoqeleka ukuba sisebenzise isu lokubabamba ngesikhathi behlasele. Abafana bami balwile kulo mdlalo obewunzima. Sizolithatha leli phuzu ngoba limqoka ngendlela eyisimanga kithina,” kusho uTembo.