Sikhuthaza abalandeli ukuqhubeka nokweseka uSuthu ngobuningi
NGIFISA ukudlulisa ukubonga kwami okukhulu kubo bonke abalandeli abaphumelele ukuhambela umhlangano wethu obungoMgqibelo ehholo iKZN Badminton, eThekwini. Ukuhanjelwa ngobuningi kwawo ngabalandeli bekilabhu kwenze umcimbi waba yimpumelelo enkulu.
Kuyajabulisa ukubona abantu abanothando lwekilabhu, lapha ngikhuluma ngabasebancane kanjalo nabadala, behlanganyela ndawonye ukuze banikele ukufeza izinhloso zekilabhu zokuba ngevelele eligini. Ngingasho ngithi liqhakazile ikusasa lamaZulu FC.
UZOKUBA YIMPI ESHUBILE OWANDULELA OWAMANQAMU WECARLING
Ngokungangabazeki, ukuhlulwa yiStellenbosch FC kube yiphilisi elibabayo ukuligwinya. Nokho ubunzima busifundise izifundo ezibalulekile futhi buqinise ukuzimisela kwethu. Sikhetha ukwamukela lo mphumela njengethuba lokukhula nokwenza kangcono ngomuso. Ikilabhu yethu iqinile, futhi sizobuya namandla amakhulu kunakuqala.
Uma sibheka phambili, sesilungiselela ukungqubuzana kowandulela owamanqamu weCarling Knockout neTS Galaxy ngeSonto ngo-15h00 eMoses Mabhida Stadium. Kungeze kwaphikwa ukuthi lapha kuzoba yimpi eshubile, kodwa sizimisele ngokulwa ngakho konke okusemandleni ethu. Sicela ukuba iKwaZulu-Natal ibumbane futhi ibe ngakithina. Sidinga ukwesekwa okuqinile kule mpi esibhekene nayo.
Masihlangane sigcwalise izinkundla, sikhombise intshisekelo nomfutho wokungapheli umoya. Abadlali bethu banamandla, futhi ukuba khona kwenu ngobuningi kuzobakhuthaza ukufinyelela ezingeni eliphakeme kakhulu. Ngokubambisana singakha inqanawe yekilabhu.
SIMINCILE NGOKULULAMA KWABADLALI BETHU ABALIMELE
Abadlali abasalulama ekulimaleni nguThembela Sikhakhane, uTaariq Fielies, uVeluyeke Zulu, uSibusiso Mabiliso njengoba ngemuva komdlalo weStellenbosch FC kubuye kwalimala noBen Motshwari. Bonke laba badlali babalulekile ekhempini yethu, kanti umqeqeshi wethu uPablo “Cijimpi” Martin uzojuluka kuleli sonto ukubuyisa ukuzethemba kubadlali.
Sengiphetha, ngifisa ukuzwakalisa ukubonga kwami okukhulu kubo bonke abalandeli ngokweseka ikilabhu. Sinenhlanhla enkulu ngokuba nabalandeli abazinikele kangaka ekilabhini. Masiqhubeke sibumbane futhi sibonise umhlaba wonke amandla esinawo.