Umjaho waseThekwini ususezingeni lomhlaba
Abagijimi sebengazenza kwiBest of the Best Marathon izikhathi zokuya kuma-Olympics
ABASUBATHI abazokwenza kahle kwiBest of the Best Marathon bazozibeka ethubeni lokumela amazwe abo kuma-Olympic Games nakumaWorld Championships njengoba lo mjaho usubhaliswe ngaphansi kwe-Abbott World Marathon Majors.
Lo mjaho oba khona minyaka yonke uhlelwa yiRavens Athletics Club, kanti owangonyaka ozayo uzokuba ngomhla ka-3 kuNdasa (March).
Uzokube uhlanganise i-42km, i-21km ne-10km ezoqala iphinde iphelele eKings Park Athletics Stadium, eThekwini.
Izindaba zokufakwa kwalo mjaho ngaphansi kwe-Abbott ziqinisekiswe ngusihlalo weRavens AC, uMthoko Khuzwayo.
Uthe umsubathi ozokwenza isikhathi esiwu-2:10 nangaphansi kwi-marathon uzohlomula ngoR10000 ngaphezulu kuka-R15 000 ozotholwa yizingqwele ngokwahlukana kobulili.
Ngeledlule iRavens ibehlele i-route tester, ibambisene nePhantane AC.
Bazophinde babe nayo ngoMgqibelo isukela eKings Park ngo-05h30, bese neHollywoodbets ibe ne-training run ngomhla ka-17 eScottburgh.
UKhuzwayo uthi umzila wabo muhle kakhulu okungenza kube lula kubasubathi ukwenza izikhathi ezinhle.
“Sesivulile ukwemukela imingenelo.
“Abagijimi abafuna ukubhalisabangangena kwi-website ethi:
www.webtickets.co.za lapho bezothola khona yonke imininingwane ngomjaho.
“Bangangena nakwethi:
racepass.co.za.
“Lo mjaho ngowokwenza isikhathi sokubamba iqhaza kwiComrades nakwiTwo Oceans Marathon.
“Okungijabulisayo wukuthi lo mjaho sewujoyine ngaphansi kwe-Abbott okuchaza ukuthi abasubathi abazokuba yingxenye yawo sebangakwazi ukugijima imiqhudelwano emikhulu emhlabeni.
“Ngonyaka ozayo silindele abasubathi abawu-10 000,” kusho uKhuzwayo.
Abafuna ulwazi ngalo mjaho bangaxhumana noMbali kwethi: 084792 2224 noma uKhuzwayo kwethi: 082 589 5102 noma bangene kwi-website ethi:
www.bestofthebestmarathon.co.za.
* Abasubathi baKwaZulu-Natal bazokhiphana inkani kwiBeds to Go Stainbank 15km Run ezokuba ngeSonto kusuka ngo-6 ekuseni eYellowwood Park Athletics Club. Ngolwazi kushayelwa uFred Schoeman kwethi: 0833844053.
* I-KZN Athletics yazisa abagijimi ukuthi imijaho iHope Challenge obekufanele ibe seThekwini ngoMgqibelo neMhlathuze Challenge obizokuba ngeSonto eRichards Bay, ngeke isaba khona.