Ubengakulindele ukunqoba indondo owoKhozi FM
USelbeyonce uthi uTshatha noSakina bebemfaka amanzi emadolweni
UMSAKAZI woKhozi FM, uSelby “Selbyonce” Mkhize uthi ubengakulindele ukunqoba emunxeni womsakazi ovelele ezinhlelweni zantambama emcimbini wama-SA Radio Awards, obungoMgqibelo eSandton Convention Centre, eGauteng.
USelbyonce ongomunye wabasakazi abangaconsi phansi kulesi sikhondlakhondla somsakazo, unqobe emunxeni we-Afternoon Drive Presenter lapho ebeqhathwe khona nozakwabo ohlelweni lwantamba uTshatha Ngobe, uSakina Kamwendo we-SA FM noLuks Gidane woMhlobo Wenene FM.
Ekhuluma neLANGA ngokunqoba kwakhe lo msakazi, uthi ubengakulindele ukuthi uzonqoba njengoba uzakwabo uTshatha noSakina bebemfaka amanzi emadolweni kulo munxa.
“Bengiqhathwe nabantu engibahloniphayo, ikakhulukazi uTshatha noSakina, bengingaziboni ngibahlula. Okunye obekwenza ngingazitsheli ukuthi ngizonqoba wukuthi uhlelo lushayelwa kakhulu uTshatha, mina ngilandela ngemuva,” kusho uSelbyonce.
Uthe nakuba kunjalo uzizwa ethobekile ngokunqoba, isho lukhulu kuyena le ndondo.
“Lena yindondo yami yokuqala yokusakaza futhi engiyithole emcimbini obheka kakhulu umkhakha womsakazo, kusho lukhulu kimina njengoba ngisenamaphupho amakhulu ngalo mkhakha.” esho.
Uthe nakuba eseke wayinqoba indondo yeDSTV Viewers Choice Awards, futhi waqokwa nakwiSunday Times Next Gen Awards kodwa akufani ngoba kuyiphupho lanoma yimuphi umsakazi ukunqoba kulo mcimbi.
“Ukunqoba kusho ukuthi angiyindawo futhi ngisaya kude kwezokusakaza,” kusho lo msakazi ongakwazanga ukuyokwamukela indondo yakhe kulo mcimbi njengoba ethi ubenomunye umsebenzi abewenza ogcine umbamba.
Uthi lo nyaka ube nezigigaba ezahlukene empilweni yakhe kodwa uyajabula ukuthi okuhle nomusa kusamlandela. Uthi imfihlo yakhe kwezokusakaza, wukulalela kakhulu imisakazo yaphesheya kwezilwandle bese efaka uthando nesitayela sakhe.
“Ngiyazihlupha ngokuzicobelela ngolwazi ukuze ngikwazi ukubona ukuthi ngingathuthuka kanjani kwezokusakaza. Ngiyacabanga ukuthi lokhu kuyawenza umehluko emoyeni uma ngiqhathaniswa nabanye abasakazi,” kusho lo msakazi obuye abe ngumlingisi.
Uthe usamile kwezokulingisa ngoba usazimisele ngokuzithuthukisa ngolwazi ngalo mkhakha.
“Bengikhuluma nethimba engisebenza nalo mayelana nokuthi ngiziqeqeshele kahle ukulingisa ukuze ngizokhula nakulolu hlangothi.
“Ngizimisele ukuthi kuyona yomibili le mikhakha ngiqhubeke nokukhula ngoba sekungicacele ukuthi ubuciko bukumina ngaphaka-thi,” esho.
Lo msakazi waveza okokuqala kuleli phephandaba ukuthi useluqalile uhlelo lokuthi abe ngowesifazane ngo
kugcwele. Ebuzwa ngokuthi selihambe lafinyelela kuphi lolu hlelo, uthe usakumisile lokhu, kuningi abesabhekene nakho kulo nyaka. “Uma wenza uhlelo olufuze lolu, kumqoka ukuthi nasesimweni somqondo ube kahle ukuze konke kuhambe kahle. Okumqoka kimina wukuthi ngiyazazi ngingubani futhi ngifuna ukwenzani ngempilo yami,” kusho yena. Kulo msakazo kuphinde kwanqoba uSihle Mavundla okumdidiyeli wohlelo Ubusuku Obuhle kanti uSiwe Cele ongumethuli wezinhlelo zikamabonakude walesi siteshi uhlonishwe ngendondo yeBright Star Inductee. Lesi siteshi siphinde saklonyeliswa ngezindondo zeStation of the Year neMy Station Most Votes.
Lena yindondo yami yokuqala yokusakaza futhi engiyithole emcimbini obheka kakhulu umkhakha womsakazo...