IMEYA IYALE ABESIFAZANE NGOKUHLUKUNYEZWA NGAMADODA
USIHLALO weKZN SALGA Commission, iMeya kuMasipala uMlalazi, uNkk Queen Xulu, usexwayise abesifazane abasothandweni oluhlukumezayo ukuba bangalindi amathonsi abanzi ukuze baphume ebudlelwaneni abahlukumezekayo kubona. Ukusho lokhu kulandela ukubulawa kukaNkz Nontokozo Nkobongo (33), waseVekeza, eShowe ngeledlule.
Ngokuthola kwaleli phephandaba, umsolwa ubesola umufi ukuthi usejola nomunye okuyilapho kuthiwa kuqubuke khona ingxabano wadonsa ummese wambhokoda ngawo.
UNkz Xulu, ukhale ngokuthi sekukaningi ehambela imindeni eyahlukene ngaphansi kukamasipala wakhe, eyokhalisa imindeni eshonelwe ngabesifazane ngemuva kokubulawa ngabesilisa abahlekisana nabo.
Ngokusho komndeni kaNkz Nkobongo, ugwazwe yisoka lakhe washona ngaso leso sikhathi.
“Ngibuhlungu ngoba sengibu-ya okwesibili kule ndawo. Ngenyanga edlule bengiseNcinyane ngomshophi ofuze wona lo. Kuyishwa ukuthi lezi zigameko zivele zidlobe ngesikhathi sikuwo impela umkhankaso ka-16 Days of No Violence Against Women and Children.
“Bantu besifazane, ngiyanicela niqaphele izimpawu zobudlelwano obunobungozi ngoba akuvele kuse sewubulawa, kodwa kusuke kunezinkomba eziningi zokuthi kungagcina kukhona olahlekelwa wumphefumulo. Ngisho impama le kayibekezelelwa,” kusho imeya.
UNkk Xulu uthe kumkhathaza umoya ukuzwa amalungu omndeni eveza ukuthi uze alahlekelwe yimpilo yakhe nje uNkz Nkobongo, bekujwayelekile ukuthi isoka lakhe limshaye, limlimaze. UNkz Nkobongo ushiye emhlabeni abantwana ababili.
Okhulumela amaphoyisa KwaZulu-Natal, uLT-Colonel Robert Netshiunda, usiqinisekisile isigameko, wathi umsolwa uboshiwe, ubhekene necala lokubulala.