Isililo kubulawa intatheli yezemidlalo uJeffrey Zikhali
Kuthiwa udutshulwe ngabantu abangaziwa esiza abahlwelwe emgwaqweni
USELE nemibuzo ongazi ukuthi iyophendulwa ngubani umndeni wakwaZikhali, KwaDlangezwa, eMpangeni, ngemuva kokubulawa kukaMnu Jeffrey Zikhali (59), owayeyintatheli edumile yezemidlalo.
Kubikwa ukuthi lesi sigameko senzeke ngoLwesihlanu ebusuku emgwaqweni u-R102, eNdabayakhe, khona eMpangeni.
Ngokusho kukaMnu Wiseman Zikhali, ongumfowabo kamufi, kuvele ukuthi umfowabo kukhona abathile abezama ukubasiza, behlwelwe emgwaqweni, okuthe esamile kwaqhamuka abanye, waba nokuhilizisana nabo, omunye wakhipha isibhamu, wamdubula.
“Ubephuma eMsinga lapho ebehlala khona ngokomsebenzi.
“Ufike eMpangeni, wadlula ezitolo kukhona abeyokulungisa.
“Lesi sigameko senzeke ngabo-20:30 ebusuku.
“Ababulali baqede ukumdubula, bathatha imoto yakhe, bamshiya khona lapho.
“Imoto itholwe ishisiwe ebangeni elingamakhilomitha awu-20 ukusuka endaweni yesigameko,” kusho uZikhali.
Ubezwakala ngisho ekhuluma ukuthi usakhungathekile ngokwenzekile.
Uthe basenemibuzo ngokubulawa komfowabo, nokuthi kungenzeka yini ukuthi kukhona abebemlandela njengoba ubephuma eMsinga.
“Umfowethu ubengumuntu wabantu, ethanda kakhulu ukusiza ngoba ngisho sekuvele ukuthi akasekho emhlabeni, abaningi bebexoxa ngezindlela ezahlukene abebasiza ngazo.
“Ubenozwelo ngendlela eyisimanga, engamshiyi umuntu ohlwelwe emgwaqweni.
“Njengomndeni sithathe isinqumo sokuthi uma kuqala isonto sibheke indaba yokwenza umsebenzi wakhe wokugcina.
“Ngoba ubesebenza nabantu abasemikhakheni eminingi, sizomemezela maphakathi nesonto ukuthi uzofihlwa nini.”
UZikhali uke wasebenza njentatheli yezemidlalo, umethuli wezinhlelo zemidlalo waphinde wasebenza naseminyangweni kahulumeni, kwezokuxhumana.
Ngokusho kukamfowabo, ubesezinze eMsinga njengoba enenkampani yokwakha, aphinde abe nabamapulazi abesebenzisana nabo, noMnyango wezoLimo.
“Nakhona emkhakheni webhola bebebuye bamsebenzise kanti ubephinde abe nobudlelwano obuhle nabamabandla, ahlukene ikakhulukazi iMishini yaKwaSizabantu, lapho ake wasebenza khona,” kusho uZikhali.
Ushiye emhlabeni inkosikazi nendodana eyodwa eneminyaka ewu-32.
Uthe bazomkhumbula kakhulu umfowabo ngobuntu nothando abenalo.
Okhulumela amaphoyisa KwaZulu-Natal, uLt-Col Robert Netshiunda, uqinisekisile ukuthi isidumbu sikaZikhali sitholwe emgwaqweni u-R102.
“Amaphoyisa abehlola azithele phezu kwesidumbu sowesilisa oneminyaka ewu-59 eseshonile, kukhona umakhalekhuwini wakhe nezincwadi zokushayela eduze kwaso.
“Sinxusa amalungu omphakathi angaba nolwazi ngokubulawa kwakhe ukuba athintane nathi enomboloweni ethi, 08600 10111 noma amaphoyisa aseMpangeni.