KwaDukuza Gospel Music Festival
INKAMPANI ebizwa ngokuthi yi- MMLG EXPRESS ehlela futhi isingathe imicimbi enhlobonhlobo, isibuye yakuphi- nda lokho nakulonyaka njengoba ihlele idili lomculo wokholo eliba njalo ngalesi sikhathi sonyaka ezinkundleni zemidlalo iStanger Manor Sports Ground, KwaDukuza.
Mhla ziyi-16 kuZibandlela (December) 2023 kulindeleke ukuba kutheleke kule ndawo izindimbane zabathandi bomculo wokholo nokuzobe sekungokwesine lokhu kwenzeka, okwenze abahleli bawo bawetha igama elithi yi-4th KwaDukuza Gospel Music Festival. Lokhu kuyizinkomba zokuthi isasasa lalo mcimbi likhula ngesivinini kule ngxenye yesifundazwe.
Ethintwa ngalezi zindaba ezimtoti, uMnu Musa Mathibela ongumsunguli wale nkampani uthe impela kuyisifiso sakhe ukuba lo mcimbi ukhule kakhulu kunalokhu. Wathi kuyamthokozisa ukubona abantu bebuthana ngobuningi ukuzobonga uNkulunkulu obagcinile kwaze kwafika emaphethelweni onyaka bephilile.
Uzwakalise nethemba lokuthi ngokukhula kwawo, lokho kungalekelela kwezomnotho wale ndawo yakwaDukuza. Phela ubukhona bawo buheha nabantu abaphuma endaweni nakwezinye izingxenye zalesi sifundazwe, nokungaba yinto exhumana kahle nezokuvakasha njengoba le ndawo idume ngomlando othinta iSilo uShaka.
Uthe leli yithuba elihle neliyivelakancane endaweni ukuba abantu baKwaDukuza babukele bukhoma abaculi abangosaziwayo abaningi kangaka emcimbini owodwa. Ukuthi uyakhula lomcimbi sekufakazelwa nawukuba khona kwabaculi abavelele nasebezakhele igama ezweni lonke kulo mculo wokholo. Bheka nje ngoba kowanonyaka kuzobe kuboshelwe izingqungqulu zabaculi abasematheni ngezingoma zabo ezivuthuphondo kulezi zinsuku.
Phakathi kwabo kubalwa laba: Abanqobi, uJumbo, uDumi Mkokstad, u-Ayanda Ntanzi, uSbu Noah, uNtencane, uXolly Mncwango, uMalusi Mbokazi, uCanaan Nyathi, uXolisa Kwinana, uSneziey, uPhindi P, nabaculi abasafufusa bakulendawo namaphethelo.
Amasango ayovulwa ngo-4 ntambama kuthi umcimbi uqale uqale ngo-6 ntambama uqhubeke ubusuku bonke uze uphele ngo-6 ekuseni.
UMnu Mathibela uphosele inselelo abantu baKwaDukuza namaphethelo, ebakhuthaza ukuba baqhubeke baweseke lo mcimbi ukukhombisa ukuthi ukusingathwa ngempumelelo kwemicimbi ekuleli zinga akusikhona okwasemadolobheni amakhulu kuphela. Uphethe ngokuthi bayophuthelwa abangafikanga kulo mcimbi, njengoba namagagu olimi lwesiZulu esakusho ukuthi amehlo kawaphathelwana.