Uvuma ingcindezi ngesizini yesibili ye-Aldulting
LBU
UKUPHELEZELA ngengoma yakhe entsha ukukhuza ibuya komdlalo kamabonakude i-Adulting, umlingisi odlala indawo kaVuyani kulo mdlalo uLuthando BU Mthembu , okuzoqala isizini yawo yesibili ngoMsombuluko. UBU oqale ukuzakhela udumo ngokuvela kwiBig Brother Mzansi, ungomunye wabalingisi abakhuza ibuya kulo mdlalo onedumela esiteshini se-internet, iShowmax.
Ube nengxoxo ekhethekile neLANGA ngohambo lwakhe kulo mkhakha. UBU odabuka kwa-P, eMlazi uthi ukungena kwakhe kulo mkhakha kakubanga lula.
Udalule ukuthi uqale ecula e-hip hop nabekhula nabo eMlazi.
“Angihlalanga isikhathi eside njengoba ngathi ngisahlale kancane ngabe ngiyongena emdansweni. Emdansweni bengidansa izinhlobo ezahlukene,” kuchaza uBU enanela ngokuthi ngenxa yobunzima bokungena kulo mkhakha, ugcine efuna umsebenzi kwelinye lamabhange amakhulu kuleli ngenhloso yokuzama ukuphila.
“Nakhona sengisebenza ebhange uthando lwami lokungena kulo mkhakha kalushabalalanga, bengiqhubeka nokwenza izinhlolokhono. Lapho bengiba nenhlanhla yokwenza izikhangiso ezahlukene, ngithole nethuba lokulingisa izindawo ezingatheni emidlalweni eyahlukene,” kusho yena.
Uthe ugcine eshiya ukusebenza ebhange, waqoma ukuyoshayela izimoto eziqashwa ngebanga (Uber/ Cab).
“Ngesikhathi sengisebenza njengomshayeli, bengiba nenhlanhla yokuqashwa ngabanye babaculi abadumile, ngaleso sikhathi bese ngizinze eGoli lapho bengifuna ukwenza impilo ibelula ukuthi ngingene kulo mkhakha. Nakhona bengithi ngishayela, ngibe ngenza izingoma ze-hip hop ngizikhipha zitholakale kwiYoutube,” kusho yena.
Uthi ngumfowabo owafika nomqondo wokuthi angene kwiBig Brother, wakubona lokhu kuyindlela yokusheshe azakhele igama kulo mkhakha.
“Nebala ngangenela futhi kwangisebenzela ngoba abantu baqala ukungibona nezingoma zami engabe ngizikhiphile bazazi njengoba ezinye zazo bezike zizwakale kwiBig Brother,” esho.
Uthi nakuba enganqobanga kwiBig Brother kodwa kwamsiza ukuze aziwe.
“Ngathi ngiphuma khona ngaba nenhlanhla yokubizelwa kwinhlolokhono yomdlalo kamabonakude i-Ayepyep Stripped, ngayithola indawo kuwona. Akuphelanga isikhathi esi-ngakanani ngathola enye indawo kwiRedemption. Lapha bese ngiqala ukuthola izindawo ezinkulu futhi nabadidiyeli bemidlalo sebengazi,” kusho yena.
Uthi isikhangiso semoto yohlobo lweSuzuki sibe nomthelela omkhulu empilweni yakhe.
Echaza ngokungena kwakhe kwi-Adulting yokuqala, uthi wayeqale ngokwenza inhlolokhono yendawo kaBonga eli-ngiswa uThembinkosi Mthembu.
“Ngeshwa angiyitholanga le ndawo, ngabe sengikhohlwa yilo mdlalo. Kwathi ngokuhamba kwesikhathi baphinde bangithinta, bengazisa ngendawo kaVuyani. Nebala ngayenza inhlolokhono kwabe sekuwukuthola kwami le ndawo,” kuchaza yena.
Uthi uzizwa ejabulile ukuba semdlalweni onedumela njenga lo.
“Angifuni ukuqamba amanga, kwangimangaza indlela abantu abayamukela ngayo isizini yokuqala yalo mdlalo njengoba yaqopha umlando kwiShowmax,” esho.
Uthi impumelelo yesizini yokuqala imenze waba nengcindezi ngesikhathi sekuqoshwa isizini yesibili.
“Ingcindezi ebenginayo ebengizifaka kuyona ngoba angiyenzi into ingekho ingcindezi ngoba iyona eyenza ngihlale ngithukile futhi ngikhuphule namasokisi. Nakuwona lo mdlalo wesibili we-Adulting, bekuphoqa ukuthi ngenze okungaphezulu,” esho.
Uchaze lo mdlalo njengothinta ngqo impilo yabantu abasebasha, abasanda kungena emkhakheni wokusebenza.
“Into ekhonjiswa kulo mdlalo impilo yansuku zonke njengoba kwaziwa ukuthi ngezimpelasonto le genge esanda kuqala ukusebenza, iyahlangana iphuze utshwala bese ifuna amantombazane kwenziwe ucansi.
Okuhle ngalo mdlalo wukuthi nakuba iveza lokhu kodwa unaso isifundo abantu abangasithola,” kusho yena
Uthi kule sizini abantu basazobhema bakholwe, neziqephu zandisiwe futhi ziningi nezigameko ezishubile abasazozibona.
Uthe ngaphandle kokuba matasa nalo mdlalo, kusasa ngoLwesihlanu uzokhipha ingoma yalo mdlalo eqanjwe ngesihloko esifanayo (Adulting).
“Umculo nokulingisa kimina kuyahambisana, yingakho ekuqaleni kwalo nyaka ngikhiphe i-EP yami ngenhloso yokukhumbuza abantu ukuthi ngisekhona emculweni,” kusho yena.
Uthe emculweni uzibiza ngoLudo
BU. Uqhube ngokuthi nakuba enamagama amabili elokucula nokulingisa kodwa ngokuhamba kwesikhathi uzogcina ezibiza ngegama elilodwa.