Uyancomeka umbiko womcwaningimabhuku
Iphucukile indlela okusetshenziswa ngayo imali yabakhokhi bentela
ENYE yezinto eziqinisa uhulumeni wentando yabantu ezweni lethu, yizinhlaka ezibizwa ngama-Chapter 9, ezasungulwa ngaphansi komthethosisekelo, ezizimele futhi abangagxambukeli osopolitiki kuzona.
Ihhovisi likaMcwaningimabhuku-Jikelele, uNkz uTsakani Maluleke, lingenye yalezo zinhlaka kanti umsebenzi walo wukubuyekeza indlela imali kahulumeni esetshenziswa ngayo.
Ngesonto eledlule uMcwaningimabhuku-Jikelele usiphe izindaba ezimnandi, ebuyekeza indlela uhulumeni ezweni lonke nohulumeni bezifundazwe abasebenza ngayo.
Kuvele ukuthi iphucukile indlela imali yabakhokhi bentela esetshenziswe ngayo.
Izikhungo zikahulumeni ezithole imibiko emihle, engenagcobho zandile zisuka kweziwu-126, zafinyelela kweziwu-147.
Isibalo salezo ezithole imibiko emibi sehlile, sisuka kweziwu-14, zaba yisihlanu. Lokhu kukhombisa ukuthi iphucukile indlela imali ephathwa ngayo, nanokuthi abantu bayaphendula ngezinqumo abazenzayo, besebenzisa imali yomphakathi.
Nokho-ke, akuyona yonke into ebiyizindaba ezinhle. Kukhona izinto ngombiko kaMcwaningimabhuku-Jikelele ezikhathazayo, njengokwanda kwezikhungo ezingaphothulwanga ukucwaningwa. Zisuke kweziwu-12 zakhuphukela kweziwu-31.
Into ekhathaza kakhulu ngalokhu, yisibalo samabhizinisi kahulumeni. YiDevelopment Bank of Southern Africa kuphela kuwona, ethole umbiko omuhle ongenagcobho.
Imibiko eminingi kayiphothuliwe, okukhona kuyona oweSouth African Airways (osekuwunyaka wesihlanu), i-Eskom, iDenel neAlexkor.
Amanye ahlehlele emuva njengeSABC, ethole umbiko omubi kakhulu.
Amanye amabhizinisi angayethulanga imibiko yi-Unemployment Insurance Fund, iNational Student Financial Aid Scheme neCompensation Fund.
Yizikhungo ezimqoka lezi ezeseka abantu abaningi eNingizimu Afrika. Ukuhluleka kwazo ukuphendula ngendlela ezisebenzise ngayo imali, kuyakhathaza.
Ukuphucuka kwezifundazwe cishe yiyonanto enhle. Lokhu kukhombisa imizamo eyenziwe wohulumeni bezifundazwe, besekwa wuMnyango wezeMali.
Ekhuluma ePhalamende uNkz Maluleke, ukubalulile ukuthi uMnyango wezeMfundo eGauteng uthole umbiko ongenagcobho kulo nyaka emuva komsebenzi weminyaka.
Zibe yisishiyagalolunye izikhungo eziphucukile KwaZulu-Natal, kwathi eMpumalanga Kapa naseNorth-West zaba yisishiyagalombili isifundazwe ngasinye.
INtshonalanga Kapa yisona sifundazwe esisahamba phambili njengoba sithole imibiko engenagcobho ewu-18.
Ngale kokucwaninga imibiko yemali, ihhovisi likaNkz Maluleke liphinde libuyekeze indlela izikhungo zikahulumeni ezihlinzeka ngayo umsebenzi nanokuthi ziqhuba kanjani ngezinhlelo ezisuke zizibekile ngonyaka.
Ezweni lonke, iminyango yezokuthutha, owemisebenzi yomphakathi nowokuhlaliswa kwabantu yenze kahle kodwa owezempilo unemibiko emine emibi kakhulu nowodwa ongaphothuliwe kwewu10.
Kuba nogcobho uma bungekho ubafakazi bezinto okuthiwa zenziwe kusukela esibalweni sezikole ezihlinzekwe ngamanzi kampompi kuya kumatayitela abhaliswe eminyangweni yokuhlaliswa kwabantu ezifundazweni.
Into elokhu iqhamukile, yiqhaza elibanjwa yimithetho iPublic Finance Management Act neMunicipal Finance Management Act, njengoba izikhungo eziningi ezihluleka ukuthola imibiko engenagcobho zikhala ngokuthi le mithetho kayizilungele.
UMcwaningimabhuku-Jikelele uthe okumqoka wukuthi kube nabaphathi abazimiselayo ukuqikelela ukuthi yonke into imi ngononina, indlela okwenziwa ngayo kanjalo nokugadwa ngayo.
Ukwenza lokho yikhona okubalulekile ukudlula imininingwane yemithetho.
UMcwaningimabhuku-Jikelele ufanele futhi ukubika ngalezo zinto ezingahambi kahle okungaba wukukhwabanisa, wukuntshontsha nanoma ngabe yini ephambene nomthetho.
Uhlabe ikhwelo lokuthi kufanele kujwayelwe ukuthi abantu baphendule futhi bathathelwe izinyathelo ngezinqumo abazenzayo.
Abaphethe imali nezinye iziphathimandla kufanele baphuthume ukuthathela izinyathelo labo abasebenzisa inkece yomphakathi budlabha noma abenza inkohlakalo.