Abhekene nemidlalo enzima amaqembu esizwe ekhilikithi

AZOKUBA nemidlalo enzima amaqembu esizwe ekhilikithi akuleli njengoba elabesifazane lizogadulisana neBangladesh bese kuthi elabesilisa litholane phezulu ne-India emidlalweni ezokuba kuleli.

Elabesifazane lakuleli libe nomdlalo walo wokuqala weT20 neBangladesh izolo ngoLwesithathu eDiamond Oval, eKimberley kanti olandelayo, wayo iT20 uzokuba kusasa ngoLwesihlanu enkundleni efanayo.

NgoLwesibili la mazwe azotholana phezulu kwi-50 over Warm Up Match eBloemfontein ngaphambi kokuqala uchungechunge lwemidlalo emithathu ye-ODI.

Umdlalo wokuqala we-ODI uzoba ngeholidi lomhla ka-16 e-East London, olandelayo ube mhla ka-20 ePotchefstroom, owokugcina uzokuba mhla ka-23 eBenoni.

NgeSonto elabesilisa lizodlala ne-India elale isibili kwiNdebe yoMhlaba ebikhona e-India, egcine inqotshwe yi-Australia.

La mazwe azogadulisana emqhudelwaneni obizwa ngeFreedom Series – ehlanganisa imidlalo emithathu ye-T20, emithathu ye-One Day International nemibili yeTest.

INingizimu Afrika kulindelwe ukuba iziphindiselele kwi-India ebukise ngayo kweyomhlaba, iyinenebula ngo-243 runs.

Iqembu leT20 nele-ODI lizoholwa ngu-Aiden Markram, kuthi eleTest Match liholwe nguTemba Bavuma.

Amathemba eqembu lakuleli kwi-T20 abekwe kuKeshav Maharaj (osesithombeni) weHollywoodbets Dolphins, uMarco Jansen obe nomdlalo omuhle kwiNdebe yoMhlaba.

*Selilonke iqembu lakuleli eliya kwi-T20 lididiyelwe kanje:

ngu-Aiden Markram, ngu-Ottniel Baartman, nguMatthew Breetzke, nguNandre Burger, nguGerald Coetzee, nguDonovan Ferreira, nguReeza Hendricks, nguMarco Jansen, nguHeinrich Klaasen, nguKeshav Maharaj, nguDavid Miller, nguLungi Ngidi, ngu-Andile Phehlukwayo; nguTabraiz Shamsi, nguTristan Stubbs noLizaad Williams.

Imidlalo yeT20 yeNingizimu Afrika ne-India imi kanje:

NGESONTO

EHollywoodbets Kingsmead Stadium: 16h00

NGOLWESIBILI

EDafabet St George's Park: 17h00

NGOLWESINE

E-DP World Wanderers Stadium: 17h00

*EyeBetway ODI Series MHLA KA-17

EDP World Wanderers Stadium: 10h00

MHLA KA-19

EDafabet St George's Park: 13h00.

MHLA KA-21

Boland Park: 13h00

*EyeBetway Test Series Mhla ka-26

ESuperSport Park: 10h00

MHLA KA-3 KUMASINGANA

ENewlands Cricket Ground: 10h00.