Kube nezikhalo eziningi ngokungahleleki kahle kwalo mjaho
BAXOLISILE kubasubathi abadidiyeli beMandela Marathon ebingoMgqibelo isukela eHilton ngaseMgungundlovu yasongwa eMandela Capture Site, eHowick.
Ngemuva komjaho abanye abasubathi bazwakalise ukujabha njengoba bekhala ngokuthi bafike umjaho sewusukile kulandela ukufika ngemuva kwesikhathi kwezimoto ebezibathutha ukubahambisa lapho ubusukela khona.
Abasubathi abaningi bathe bafike lapho kusuka khona umjaho kungasekho muntu ngenxa yezimoto, okunye abakhale ngakho wukuthi umjaho uqale ngemuva kwesikhathi.
Lo mjaho bewuhlelwe wuhulumeni waKwaZulu-Natal, ngokubambisana neKZN Athletics noMgungundlovu Municipality.
Embikweni okhishwe ngabeMandela Marathon, bathe bayaxolisa kakhulu kubagijimi ngesimo abazithole sebebhekana naso.
Bathi bebezamile ukuzihlela kahle izinto, kubalwa nendlela eqondile yokulanda abagijimi ukubahambisa lapho bekusukela khona umjaho.
Bathi bazokwenza uphenyo ukuthola ukuthi kube yini imbangela yokufika ngemuva kwesikhathi kwezimoto.
Uma singena kuwo umjaho obungenelwe ngabasubathi abambalwa kungafani naseminyakeni edlule - uthathwe nguJobo Khatoane weMaxed Elite waseLesotho ngesikhathi esiwu65:00 wagoduka no-R20 000, kwathi ingqwele yabesifazane kwaba nguJenet Mbhele waseMzimkhulu, weXcel Running Club.
UKhatoane ushaye intambo ebekwe ezithendeni nguSeutloali Khaorahlane obelandelwa nguSinethemba Tshangase.
UJenet usefomini njengoba maphakathi nonyaka aphakamisa ifulegi lesifundazwe esizuzela indondo yegolide kwiComrades Marathon.
UJenet wenze isikhathi esiwu1:19 kwathi uMathakane Letsie wangena isibili ngesikhathi esiwu-1:20 kanti uNontokozo
Mkhize ulale isithathu.
IXcel yenze kahle kakhulu kulo mjaho njengoba uSibusiso Kubheka ebe yingqwele ye-10km ebekwe ezithendeni nguKamohelo Mofolo, kwathi uBongelani Mkhwanazi wathatha indawo yesithathu.
Kwabesifazane ingqwele kube nguNwabisa Mjoli wePhantane AC elandelwa ngu-Andisiwe Njunguza weXcel, kwathi uNonhle Dlamini walala isithathu. UKubheka utshele abezindaba ukuthi ube nomjaho omuhle.
Uthi unethemba lokuthi ukunqoba kwakhe lo mjaho kuzokuba nomthelela omuhle empilweni yakhe njengoba kuzoqala unyaka omusha. Uthi u-2022 wamphazamisa kakhulu ehlushwa wukulimala.
* Isiyonke imiphumela yalo mjaho ihambe ngalolu hlobo, kwabesilisa: 1.Jobo Khatoane 1:05:00, 2.Seutloali Khaorahlane 1:05:59, 3.Sinethemba Tshangase 1:06:46.
Ku-35 kuya ku-39: 1.Jobo Khatoane 1:05:00, 2.Tebogo Noosi 1:07:20, 3. Litlhoka 1:10:19.
Ku-40 kuya ku-49: