BANYELWE YINYONI ESANDLENI
BANYELWE yinyoni esandleni abadlali beNetball abebeyingxenye yemidlalo yamaSalga Games, ebingempelasonto eKing Cetshwayo District Municipality, eRichards Bay njengoba bethole ithuba lokufakwa emaqenjini esifundazwe azokuba yingxenye yeMpumakapa Tournament eqala kusasa ngoLwesihlanu isongwe ngeSonto e-Eastern Cape.
Imidlalo yamaSalga iba minyaka yonke idlalwa ngomasipala besifundazwe. Eyanonyaka icishe yabhuntsha kulandela ukuhoxa koMnyango wezeMidlalo ngosuku lokugcina. Sekuwumlando manje ukuthi le midlalo igcine itakulwe ngabakwa-Aquelle, iCebolethu, Amathole Funeral neThala Bank.
Ukuba khona kwalaba baxhasi kuqinisekiswe nguSihlalo wamaSalga, uThami Ntuli oyiMeya yaseKing Cetshwayo. Kulo mqhudelwano bekugaduliswana emidlalweni ewu-13 eyahlukene, abekhona cishe wonke ama-federation.
UMengameli weKwaZulu-Natal Netball, uGugu Ngema uwuncome kakhulu lo mqhudelwano.
“Lo mqhudelwano ubaluleke kakhulu kubadlali besifundazwe. Thina usisiza ekutholeni abadlali abasha njengoba abanye kuyenzeka bahambe uma kuphela unyaka, baye kwezinye izifundazwe. Siye siphoqeleke ukufuna abasha abazovala izikhala.
“Kumanje kunabadlali esibaqokile kumaSalga abazokuba yingxenye yomncintiswano esizokuba nawo ngempelasonto e-Eastern Cape lapho simenywe khona. Siqoke abadlali abazodlala emaqenjini ethu amabili, okuyiKingdom Stars neKingdom Queens. Laba badlali sizoqala ukubabona ngempelasonto e-Eastern Cape,” kusho uGugu.
Emqhudelwaneni wamaSalga wanonyaka bekukhona omasipala abawu-8.
Izingqwele kube yiTheku lilandelwa wuMzinyathi, isithathu kwaba yiKing Cetshwayo. ITheku bese linqoba lo mqhudelwano okwesithupha kulandelana. Ngesikhathi kuvalwa uNtuli umemezele ukuthi ufisa ukuba imidlalo elandelayo ibanjelwe eThekwini.
Abadlali beNetball abaqokiwe abazokuba yingxenye yeKingdom Stars nguNelisiwe Msweli (King Cetshwayo), ngu-Asanda Myeni (Mkhanyakude), nguNokwazi Manyukuza (uMkhanyakude), nguJordan Buys (eThekwini), nguTho-bekile Mjaja (eThekwini), nguPercy
Nxumalo (eThekwini), nguMbali Chonco (King Cetshwayo), nguPhilile Bokwe (eThekwini), nguSphiwe Sibisi, nguLunwabo Khumalo (Zululand), ngu-Ayanda Jiyane noSenamile Mthembu.
* EleKingdom Queens nguKhethokuhle Mdletshe (Zululand), nguNokwanda Zulu (King Cetshwayo), nguNokuthula Nxele (uMgungundlovu), nguTannah de Freitas (eThekwini), nguTyra Scott (eThekwini), nguNompumelelo Khumalo (King Cetshwayo), ngu-Asanda Ndaba (King Cetshwayo), nguSilindile Sithole (uMkhanyakude), nguMakhosi Mncube (uMkhanyakude), nguNtombenhle Shongwe (Zululand), nguNontokozo Sibiya (King Cetshwayo) noBongekile Sibiya (Zululand).