BATHI BAJABHILE NGORAMAPHOSA ABAPHIKISA ISILO UMISUZULU
BEBEPHUME ngobuningi babo abaNtwana baseNdlunkulu kaZulu, ohlangothini oluhambisana noMntwana uSimakade emhlanganweni wabo obusesigodlweni sasoSuthu izolo ngeSonto.
Lo mhlangano bekuhloswe ngawo ukuzokwethula umbiko weJaji uNorman Davis, othe uMengameli Cyril Ramaphosa kwakumele aqoke ikomidi elizophenya ngezinsolo zokuthi iSilo uMisuzulu kasiqokwanga ngendlela efanele, ngaphambi kokusinika isitifiketi.
UMntwana uThokozani – oyisethenjwa soMntwana uSimakade – utshele abezindaba ukuthi: “Besihlangene namhlanje (izolo ngeSonto) sizokwethulela umndeni umbiko wejaji, siphinde sigqugquzele ubumbano eNdlunkulu.
“AbaNtwana bebemenywe bonke, abanye bafikile abanye bathumele izixoliso.
“Yize kukhona abangafikanga, kodwa ngeke siphele amandla ekuqhubekeni nokwenza imizamo yokubuyisana.
“Sijabule kakhulu ngesinqumo senkantolo, ifakazele esasikusho ukuthi kakulandelwanga imigomo kuqokwa uMntwana uMisuzulu.
“Singaphinda sikuveze ukuthi isiphathe kabi indlela uMengameli Ramaphosa aziphathe ngayo kulolu daba.
“Isenzo sakhe sokwedlulisa icala kusenze samthatha njengesitha sethu sokuqala. Ukhuluma okunye, enze okunye.
“Umbiko wejaji ukuveze ngokusobala ukuthi wagagamela.
“UMntwana uThembi wambhalela incwadi, emtshela ukuthi ukhathazekile ngendlela aqoke ngayo uMisuzulu kodwa yena wayishaya indiva.”
Lo mhlangano ubuhanjelwe ngabaNtwana abaqhamuka ezindlini ezehlukene, abanye bebegqoke izikipha ezinobuso boMntwana uSimakade, ezibhaliwe ukuthi: “ISilo soSelwa”.
Izindlu ebezikhona ngeyaseMpangisweni, ngeyakwaMinyamanzi, ngeyasoNkweni, ngeyaseMatheni neyaKwaNobamba.