KUKHALWA NGEPHUTHA KUMASIPALA WETHEKU NGEMALI YEMFUCUZA

SEKUQUBUKE izikhalo ngendlela uMasipala weTheku ophambuka ngayo ngemali yokuqoqwa kwemfucuza kwabahlala ngaphansi kwawo.

Iqembu eliphikisayo kulo masipala iDemocratic Alliance (DA) liveze ukuthi lo masipala uthumelela izakhamizi izincwadi ezingashayi khona uma kuyiwa emalini okumele ikhokhwe ngabahlala kuleli dolobha. I-DA iveze ukuthi inkinga ekhona isukela kudala ngesikhathi lo masipala wenza izinguquko ohlelweni lwawo lokuqoqwa kwemali.

Ithe lo masipala usuthathe isikhathi ukulungisa le nkinga esaqhubeka nokuhlukumeza izakhamizi njengoba abanye begcina bengena ezikweletini ngenxa yezizumbulu umasipala ozifunayo ngokuqoqwa kwemfucuza.

Ikhale ngokuthi phezu kwezinkinga zemali izakhamizi ezibhekane nazo kulo nyaka, lo masipala usaqhubeka nokuthela usawoti esilondeni ngokuthumela izincwadi eziphoqa ukuba zikhokhe izizumbulu zemali.

Ithi okukhathaza kakhulu ngalokhu wukuthi iphutha kalikho ezakhamizini kodwa ladaleka ngesikhathi lo masipala wenza izinguquko.

Iphinde yakhala nangomthetho walo masipala ophoqa izakhamizi ukukhokha kuqala bese ukhononda ngemuva kwalokho. Lithe lo mthetho ucindezela izakhamizi.

UNkk Yogis Govender oyilungu laleli qembu kulo masipala, uthe kuyishwa ukuthi amaphutha enzeka ngaphakathi kumasipala adala umthwalo ezakhamizini njengoba sekumele kube yizona ezikhokha imali kungafanele.

Unxuse bonke abathole izincwadi ezinemali engafanele ukuba bathumele izikhalo zabo ngokungena kwiwebsite yalo masipala ukuze izinkinga zabo zixazululeke.

Okhulumela uMasipala weTheku uNkz Gugu Sisilana uthunyelelwe imibuzo mayelana nalolu daba kodwa kwashaya isikhathi sokuloba engakaphenduli.