Yiba yisivakashi esisebenzisa umqondo nesithokozelekayo ngalesi sikhathi
kwalokho usuzoqala ukuba yisinengiso.
Kumele uhambe kusemnandi, nawe ungaze ukhululeke kakhulu sengathi usukwakho.
Kuke kube yinkinga kakhulu uma isivakashi sakho sifike nabantwana abangaqoqekile kahle, begijima indlu yonke, bedlala kube kuhlezi abantu abadala bexoxa.
Uthole zizingenela nasesiqandisini, ziqede wena shizi, amayogathi nonemenayithi, abazali bazo bathule nje, futhi bangenzi minyakazo yokuthenga igilosa. Ngake ngaba nezivakashi ezinjalo. Kwathi lapho isiqandisi sesome okogwadule, ngezwa lona wesifazane esethi izingane seziswela ezizokudla. Ngathula sengathi angimzwanga. Kwedlula usuku elokhu ebelesele kodwa engayi esitolo. Umyeni wakhe waze wazidela, weza kimi, esho sona leso. Ngamtshela ukuthi lokho kakuyona inkinga yami kodwa ngeyabo njengabazali balezi zingane.
Notshwala bami babushaya bavala ; ngehlahla kubona, kwathi uma kuvukwa, abantu bakhala ngebhabhalazi sengathi kabazi ukuthi utshwala butholakala kuphi.
Abantu abamenywe nguwe yibo ongabatenda, ubathengele konke ngoba phela nguwe obasukele bezihlalele.
Laba abakutshela sebekhulume baqeda bebodwa kufanele balungise nemadlana yokusiza lapho ushoda khona ngoba ubungazilungiselelanga ukuba nezivakashi ngokwemali.
Kule sikhathi sanamuhla siphila ngebhajethi, akekho umuntu onesihlahla semali.
Uzokwemukela izivakashi ngoDisemba bese zikushiya ungenakudla inyanga yonke kaJanuwari, usudla amanzi okwenkalankala.
Kwakungcono kusenamasimu futhi esalinywa ngoba phela kwakuvunwa lokho okuvuthiwe, bese kudliwa. Namuhla yonke into iyathengwa kanti nemali kayibonwa.
Mina ngakhetha ukwakha indlu yesibili enekhishi, amagumbi amabili okulala, indlu yangasese neyokugezela negumbi lokuphola.
Yiyo-ke eyezivakashi, ukuze zingangihluphi ngalutho.
Kakukhathalekile ukuthi ngiyakuzala noma uyisihlobo, fika negilosa yakho elingene lesi sikhathi ozosihlala, noncamnce bezingane zakho.
Kuleyo ndlu unesiqandisi sakho nesitofu sokupheka, sihlangana egcekeni uma sesivukile sonke, sikhethe-ke ukuthi sosa inyama siphuze noma siyapheka.
Okosiwayo ngingakuthenga kodwa utshwala umuntu uzithengela akuphuzayo. Siphila njengomakhelwane. Singamemana uzodla isidlo sasebusuku noma sasemini, kodwa umuntu uyaziphekela.
Ngaleyo ndlela akekho ohlupha omunye futhi nezindlu esikuzo siyazihlanzela zona.
Uma uyithole ihlanzekile lena yezivakashi, bese uyishiya ingcolile, usuke ucabanga ukuthi izozihlanza yona yini?
Uma uhamba usuphuthuma, ushiya imali yokukhokhela umuntu ozoqashwa ayihlanze.
Uma uhlezi ehhotela bayakuhlanzela igumbi lakho ngoba uyakhokha, kodwa lapha kimi uhlala mahhala, kawukhokhi ngisho isenti lodwa leli.
Ngosuku ohamba ngalo ngiyaya ukuyobona ukuthi indlu ihlanzekile yini ngaphambi kokuba ngikuvulele isango uhambe.
Laba abahluphayo uma bevakashile, bekuvusa usalele bebuza ukuthi usalele yini, kangisabavumeli bavakashe.
Uma ngifuna ukuvuka ngothwalofu ngizovuka ngawo, sibonane egcekeni.
Uma wena ungumuntu ovuka ekuseni kakhulu, phuma uyobuka indawo noma uzulazule egcekeni, kodwa ungangivusi.
Abanye bathi uma bevakashile beze nohlu lwezinto okumele nizenze ninonke, kuyiwe ngapha nangapha, kuyobonwa lokhu nalokhuya.
Mina nginezinto zami engizenzayo, ungangidleli isikhathi sami