Ube ngonzima lo nyaka ezweni ngokwesimo somnotho
LISUNGULWE NGOWE-1903
LO NYAKA esiwuphethayo ungomunye webe nzima ngokwesimo somnotho, kusukela kwangena uhulumeni wentando yeningi eNingizimu Afrika ngo-1994. Ngeshwa lethu, nawo lona esiwuqalayo ngoMsombuluko kubukeka uzokuba mubi, njengoba zingekho izimpawu ezikhomba ukuba ngcono kwesimo. Izigidi zabantu, ikakhulukazi intsha, kazisebenzi. Labo abanenhlanhla yokubamba amatoho ezinkampanini ezingekho ngaphansi kukahulumeni, iningi labo kudala lagcina ukukhushulelwa amaholo, kayisaphathwa eyamabhonasi okuphela konyaka.
Ukudla ezitolo kumba eqolo, kanti kulabo abanezimoto nezindlu abazithenga ngezikweletu zasemabhange, sekunzima ukuzikhokhela. Abanye sebeze badlelwa imizi nezimoto ngamabhange, ngenxa yezikweletu.
Ngaphandle komnotho obuthaka, izigelekeqe zizenzela umathanda ezweni, umthetho kawusahlonishwa. Imigulukudu kayizigqizi qakala izinhlaka zomthetho, njengamaphoyisa nezinkantolo, kanti uhulumeni usonge izandla, abantu bebhuqwabhuqwa yizinswelaboya.
Empeleni, uhulumeni ubukeka usuphelelwe ngamaqhinga okuxazulula izinkinga ezigubuzele izwe.
Ezinye izinkinga ezinkulu, ekagqamcishi nokunqamuka kwamanzi, ngisho nasemadolobheni amakhulu, esingabala kuwo iTheku neGoli.
Zonke lezi zinkinga zenza umuntu aphelelwe yithemba ngekusasa lezwe, azibuze ukuthi engabe kuyogcinaphi, kazi iyozala nkomoni. Ngabe naleli lisendleleni eyahanjwa yiningi lamazwe ase-Afrika emuva kokuthola inkululeko emibusweni yamakoloni?
Ngabe izingane zethu ziyogcina ziyizicelankobe nemihambima kwamanye amazwe abamhlophe aseNtshonalanga, njengoba kwenzeka ezigidini zabantu base-Afrika nabakwamanye amazwe ahluphekayo, ezibalekela emazweni aseNtshonalanga, ziyobheka amathuba angcono empilo?
Noma isimo sisibi kakhulu nakuleli, kodwa kukhona esisengakwenza ukuphuma kule ndlela ebheke eweni, esihamba ngayo njengamanje. Okokuqala, kufanele sipheze ukwethembela kosopolitiki nasemaqenjini ezombusazwe ukuthi azosixazululela zonke izinkinga zethu.
Ukubuka labo abathi bangabaholi bethu njengonkulunkulu abazosenzela konke esikufunayo, kuzosilimaza.
Amazwe aphumelelayo kwezomnotho nakweminye imikhakha yempilo, njengeMelika nje, anezakhamizi ezikhonze ukuzimela nokuzenzela, hhayi ukuba ngokhangezile kuhulumeni.
Kulo nyaka oqalayo, sikhuthaza abantu bakithi ukufunda ukuzimela nokukhuthala. Kungani emakhaya ethu amasimu esamila imbuya? Zashonaphi izivande ezazikhona ngisho emalokishini ngesikhathi sobandlululo?
Ezinyangeni ezimbalwa ezizayo, izakhamizi zizothola ithuba lokuqoka uhulumeni omusha, njengoba kuzoba nokhetho lwezifundazwe nolukazwelonke. Kumele abantu balisebenzise leli thuba, bakhethe abaholi abacabanga ukuthi bangakhipha izwe ezinkingeni elibhekene nazo.
Sithatha leli thuba ukufisela abafundi bethu unyaka omusha onempumelelo nezibusiso. Sibonga kasiphezi ngokuseseka kwenu kulezi zikhathi ezinzima ezweni lethu.
Ningadinwa nangomuso.