Kulamule inkosikazi kaNgema ngomngcwabo wakhe
Yazise umndeni wale nkakha ngeyakusho ukwenzeka nxa isikwelamathongo
UMNDENI wenkakha yezeshashalazi eshone ngeledlule uMbongeni Ngema, uchitha izinkulumo ezisabalele ngokuhlukana phakathi kwawo mayelana nokufihlwa kwalesi silomo.
Kuleli sonto kusabalale imibiko ethi umndeni uhlukene phakathi njengoba bekuthiwa kunamanye amalungu omndeni abefuna ayofihlwa eNhlwathi, KwaHlabisa lapho umndeni wakhe udabuka khona - ngakolunye uhlangothi kunabanye abahambisana nokuthi abekwe emathuneni amaqhawe aseNingizimu Afrika, iHeroes’ Acre, eChesterville.
UNhlanhla Ngema ongumfowabo omncane kamufi - ekhuluma neLANGA - ukuqinisekisile ukuthi uke waba khona umuzwa wokuthi abekwe eNhlwathi, kodwa umkakhe uNkk Nompumelelo Ngema, uMaGumede, nguyena oveze ukuthi umyeni wakhe wazisholo yena ukuthi ufisa ukubekwa kuphi futhi kanjani.
“Thina njengomndeni sihloniphe okuvezwe ngumkakhe uMaGumede, okunguyena ositshele ukuthi wathi ufuna ukufihlwa kanjani. Siwumndeni sibe sesivumelana sonke ukuthi inkonzo yakhe yomngcwabo kumele ihambe kanjani,” kuchaza uNhlanhla.
Uthi ufunde lukhulu kumfowabo njengoba naye esemkhakheni wezeshashalazi.
Uthe okwamanje kusenzima ukuveza ukuthi uzomkhumbula kanjani umfowabo njengoba kukuningi akwenzile, wamchushisa
kokuningi nangalo mkhakha.
Uphinde wacacisa nokuthi ukungenelela kukahulumeni kakushintshanga lutho njengoba kuwumndeni obuthatha izinqumo.
“Siyakubonga ukungenelela kukahulumeni futhi okuhle wukuthi uzwa ngathi njengomndeni, kawusithatheli izinqumo ngendlela esizimisele ngokumbeka ngayo endlini yokugcina,” kusho uNhlanhla.
Uthi zikhona izinhlelo abazoba nazo ukuqinisekisa ukuthi umsebenzi kamfowabo kawushabalali.
“Okwamanje ngeke sidalule
okuningi ngoba sisabheke ekutheni simbeke endlini yokugcina bese kuyilapho sidalula khona izinhlelo zokumkhumbula esizozenza ukuqinisekisa ukuthi igama lakhe liyaqhubeka nokuba kwibalazwe lomhlaba,” esho.
Inkonzo yesikhumbuzo kaNgema ibibanjelwe eThe Playhouse, eThekwini, izolo ngoLwesithathu lapho obekuphume khona amaciko ahlukene amanye akhiqizwe yisandla sakhe, abaholi bezepolitiki namalungu omphakathi.
Le nkonzo ibigqame ngezobuciko njengoba ivulwe ngezingoma
ezikhiqizwe yile nkakha ebihlanganisa wonke amaciko esebenze nawo kusukela ngesikhathi ikhiqiza imidlalo okubalwa kuyo othi Asinamali, iSarafina, Imbube, neThe Zulu.
UNgema uchazwe njengenkakha ebikukhuthalele ukuqeqesha kwezobuciko futhi ezinikela emsebenzini wakhe.
Uphinde wachazwa njengobambe iqhaza elimqoka ukulwa nohulumeni wobandlululo esebenzisa ishashalazi. Bheka ekhasini 20 no-21.
lucky.cain@ilanganews.co.za