UMCULI UCELA KUNIKWE UMNDENI KANINA WENGANE YAKHE ISIKHATHI SOKUZILA
USEPHUMELE obala umculi uMondli Ngcobo ngokubhecwa ngezinsolo zokuba yimbangela yokushona kukanina wengane yakhe.
NgoLwesine kusabalale izindaba zokushona kukaMandy Malebo ongunina wengane kaMondli obekusolakala ukuthi uzibulele. Abalandeli bezinkundla zokuxhumana basole uMondli ngokuba nomthelela ekushoneni kukanina wengane yakhe. Lokhu kulandela i-video eyayifakwe ngumufi enkundleni yezokuxhumana lapho ayesola khona lo mculi ngokungondli.
Ngemuva kokushona kwale ntokazi, le video iphinde yaqubuka futhi ezinkundleni zokuxhumana, kwanemibono eyahlukene ngayo.
NgoMgqibelo uMondli - obuye abe nguphrojusa - ufake umyalezo athe uwuthunyelelwe ngumndeni kanina wengane yakhe, obewuqinisekisa ngokushona kwakhe.
“Ngokukhulu ukudangala siqinisekisa ukudlula emhlabeni kwendodakazi yethu ethandekayo uMandy Malebo. Ugule ekhala ngobuhlungu esiswini, wangeniswa esibhedlela mhla ka-27 kuZibandlela (December). Isimo sakhe sempilo sibe sibi ngemuva kwalokho okuholele ekutheni umphefumulo wehlukane nenyama,” kusho umbhalo ekhasini le-Instagram, lapho ibhokisi lokubhala imiyalezo belivaliwe khona.
Ngemuva kwesitatimende uMondli ubhale ukuthi: “Ngiwazwile amahemuhemu anhlobonhlobo abuhlungu ngembangela yokushona, amayelana nami, kodwa ngicela ninike umndeni isikhathi sokuzi
la, ukubhekana nesimo sokulahlekelwa. Ngisalinde umndeni wakhe ukuba uhlanganise amalungiselelo okumfihla, ngizobe sengiwaveza.”
Okuphinde kwaqapheleka wukuthi uphinde walivula ibhokisi lemiyalezo, bamkhalisa ozakwabo endimeni yezokungcebeleka, kepha waphinde walivala futhi.