Abesiqiwi babonge iqhaza lamakhosi
Bathi sebenobudlwelwano obuhle nemiphakathi abebeklwebhana nayo
UBONGE ubudlelwano obuhle obulokhu buqhubekile phakathi kwepaki enkulukazi eNingizimu Afrika namakhosi akhelene nayo uMnu Sibusiso Bukhosini - oyisikhulu esiphezulu eSimangaliso Wetland Park - ngesikhathi ewaxoshisa ngeziklabhu ukuwabonga.
Lo mcimbi ububanjelwe eSimangaliso Wetland Park, lapho uBukhosini ezwakalise khona ukuthi likhulu iqhaza elibanjwe yila makhosi ekuqinisekiseni ukuthi ipaki inobudlelwano obuhle nemiphakathi eyakhe eduze kwayo. Lesi siqiwi siqala eSt Lucia ngaphansi kobukhosi bakwaSokhulu size siyophela eKosi Bay, ngaphansi kobukhosi bakwaTembe.
Kuzokhumbuleka ukuthi kuke kwaba ne- zingqinamba eziningi kulesi siqiwi, ezinye zazo ezenze kasaze sakwazi ukuba nobudle- lwano obuhle nemiphakathi eyakhe eduze naso. Abaningi bebekhala ngokuthi basuswa ezindaweni zabo ngoba kuthiwa kwakhiwa lesi siqiwi ukuze kongiwe imvelo, namagugu kodwa bona kungekho abakuhlomulayo kulokho.
Ngesikhathi ethatha isikhundla sokuba yisikhulu esiphezulu kule paki uBukhosini, wathi uzimisele ngokulungisa ubudlelwano besiqiwi nemiphakathi engomakhelwane baso, kube nokubambisana.
Ekhuluma kulo mcimbi, uthe ukhethe ukuhlangana namakhosi ukuwabungaza ngeqhaza alibambayo ekuqinisekiseni ukuthi banobudlelwano obuhle nomphakathi.
Lokhu uthi bakwenza ngokuthi babe nezinhlelo ezihlomulisa umphakathi kuqala ngokuthi kube namathuba emisebenzi.
“Kumuntu olala engadlile kakuwenzi umqondo ukuthi angayi ukuyozingela esiqiwini esinazo zonke izinyamazane, kodwa uma ukongiwa kwemvelo kumvulela amathuba okusebenza ukuze axoshe ikati eziko, lokho kuyamkhuthaza naye futhi, kumenze akubone kubalulekile ukongiwa kwemvelo,” esho.
ISimangaliso yipaki ethandwa kakhulu yizivakashi zaphesheya kwezilwandle njengoba iphinde ibe nomlando ojulile.
“Siyazi ukuthi kwaba khona ukususwa kwabantu bakithi ezindaweni zabo, baphinde baba nokucindezeleka phambilini. Njengobuholi obukhona senza konke okusemandleni ukuqinisekisa ukuthi ubudlelwano bepaki nemiphakathi buhle. Kuyimanje sinezinhlelo ezahlukene eziqasha abantu bakithi ukuba basebenze.
“Kunenqwaba yabantu abaqashwe ngaphansi kohlelo lokuhlanza amadolobha, abasebenza komasipala abahlukene ukususa izihlahla lezi ezingafuneki, ezibulala imvelo baphinde bahlanze idolobha. Lapho siqashe abantu abangaphansi komasipala esingabala kubona owaseJozini, uMhlabuyalingana, iBig 5 Hlabisa, iMfolozi neNkosi Mtubatuba,” esho.
Uthi amakhosi abambe iqhaza elikhulu ekufundiseni imiphakathi eyakhele le ndawo ngokubaluleka kokongiwa kwemvelo.
Uthi ngisho kunamathuba emisebenzi baxhumana namakhosi kuqala ukuze atshele abantu emiphakathini yawo. INkosi Mabhudu Tembe ingusihlalo webhodi lale paki.
Amakhosi axoshiswe ngeziklabhu ngeyakwaTembe, ngeyakwaMabaso, ngeyaseMbila, ngeyakwaJobe, ngeyaseNside, ngeyaKwaNgwenya, ngeyaseMqobokazi, ngeyaseMakhasa, ngeyaKwaNibela, ngeyaseMdletsheni, ngeyaKwaMpukunyoni neyakwaSokhulu.
Usihlalo wamakhosi eMkhanyakude obeyisimenywa naye oxoshiswe ngesiklabhu iNkosi Mbusowesizwe Gumede wesizwe sakwaSqakatha ubonge ukhisimusi abawuthole kumphathi walesi siqiwi, wathi abakufisayo wukuthi abantu bahlomule ngokuba khona kwaso, nokuthi kuqhubeke kube nokubambisana.