SEKUKHALA ISICATHULO SOMGABADELI KWIMARITZBURG UNITED
IQASHE umqeqeshi onesipiliyoni iMaritzburg United okubhekwe lukhulu kuyona njengoba isiqale amalungiselelo omzuliswano wesibili kwiMotsepe Foundation Championship (MFC) ngoNhlolanja (February).
ILANGA lithole ukuthi uFarook Kadodia ongumnikazi weTeam of Choice, usenqume ukunika ngokugcwele isikhundla sokuqeqesha le kilabhu uSimo “Govuza” Dladla owayeqashelwe ukuba yiphini likaZipho Dlangalala, owakhonjwa indlela ngaphambi kokuvalela amaholidi kaKhisimusi.
UDladla kuphele unyaka odlule eyibamba kulesi sikhundla.
Kuthiwa le kilabhu ilande noPitso Dladla obeyiphini likaSteven Pollack kwiMarumo Gallants nayo edlala kwiMFC.
UPitso uzosiza uGovuza kanti kuthiwa abaphathi beMaritzburg bamatasa bazama nokusondeza uSiyabonga Mdluli ukuba akhuze ibuya kule kilabhu.
Ukuqashwa kukaPitso ukusiza uSimo, kuzokwenza ukuba kukhale isicathulo soMgabadeli kule kilabhu njengoba bethakazelwa kanjalo abakwaDladla.
Kuthiwa abanye abangase bajoyine le kilabhu, nguMfanafuthi “Cothoza” Gwala, ozobhekana nokulolonga onozinti.
Kubikwa ukuthi uGwala ulandelwe isipiliyoni anaso njengoba ebeyibambe kuMkhambathi FC ogijima kwiSafa KZN ABC Motsepe League.
“Yiqiniso ukuthi kuningi okwenzekayo kwiTeam of Choice. Kungase kwenziwe isimemezelo maduzane.
“Le kilabhu ikholwa wukuthi uSimo angakwazi ukuyisa phambili lapho iphokophele khona,” kusho umthombo.
Kuthiwa abanye abangenile kule kilabhu ngu-Abongwe Bafo ozoqondana nokubhucabhuca nokuqinisa imizimba yabadlali.
ULucky Hlela obecija onozinti, kuvela ukuthi ushenxisiwe esikwatini esikhulu.
Imizamo yokuthola uKadodia iphunzile kwazise ucingo lwakhe belukhala kodwa lungabanjwa kwaze kwashaya isikhathi sokuloba lo mbiko.
I-University of Pretoria igcine isayinise uHarold Majadibodu owake wayibamba kwiMamelodi Sundowns kanti iBaroka FC ikhombe indlela uNtiyiso Bombi eyamthatha kwiMarumo Gallants Reserves ngesizini edlule.