UKHALE NGENKUNZI OWE-STELLIES BEGUQA
UKHALE ngokubanjwa inkunzi uSteve Barker (osesithombeni) ongumqeqeshi weStellenbosch FC ehlulwe yiCarling Black Label All Stars ngo-2-1 koweCarling Black Label Final ngoMgqibelo ePeter Mokaba Stadium, ePolokwane.
IStellenbosch iye kulo mdlalo emuva kokuba inqobe iCarling Knockout Cup, yehlula iTS Galaxy kowamanqamu ngenyanga edlule eMoses Mabhida Stadium, eThekwini.
“Bekungelona usuku lwethu lokunqoba uma ubheka indlela izinto ezihambe ngakhona. Sishaye ipali ngemizuzu yokuqala, sangenelwa yigoli engicabanga ukuthi besingenza kangcono kulona. Emuva kwalokho, bathole iphenathi engikholwa wukuthi bekungafanele bayithole.
“Ngiyababongela ngokunqoba kwabo, kodwa kangikholwa ukuthi basinike inkinga, kube yikho nje ukuthi izinto bezingasihambeli kahle. Besidlala neqembu elihle, elinabadlali abadlala kahle, ngeke usho ukuthi babe nesikhathi esincane sokuhlangana.
“Okuhle nje wukuthi sikwazile ukudlala lo mdlalo, sakhombisa ukuthi siyiqembu elibheke impumelelo. Njengamanje sizophumula ngethemba lokuthi sizobuya sesingcono kakhulu uma kubuywa ekhefini (leCaf). Ukwehlulwa kwesinye isikhathi kuyasiza ngoba kwenza ukwazi ukunyusa amasokisi.
“Okufike kwangimangalisa kakhulu, wukuthi kwengezwe imizuzu emine emuva kokuba isikhathi simoshwe kangaka enkundleni, kodwa-ke kulungile, sizofunda emaphutheni esiwenzile ukuze sibuye sesingcono kakhulu ngokuzayo,” kusho lo mqeqeshi onqobe inkomishi yakhe yokuqala nale kilabhu asehlale kuyona kusukela ngo-2017.
Kube ngokokuqala kulo mdlalo ukuba u-Iqraam Rayners ongumdlali weStellies aphume elambatha kwazise wayinqoba yonke imiklomelo yomdlali ovelele kwiCarling Knockout okwenza, wagoduka no-R400 000.
Nakuba yehluliwe iStellenbosch, kodwa ikhombisile ukuthi isazoqhubeka nokuba yingozi
emakilabhini ezobhekana nawo.
Ukuba u-Itumeleng Khune obevimbele i-All Stars - ubengaphapheme kulo mdlalo, ngabe sicula enye ingoma ngalo mphumela walo mdlalo.