UMSEBENZI KAMAGUBANE KAWUNAKUSHABALALA RAMAPHOSA
“UWILE umuthi omkhulu, siyalila ngoMnu Peter Magubane futhi sihlonipha ifagugu lakhe.”
Lawa ngamazwi kaMengameli Cyril Ramaphosa, acashunwe enkulumeni yakhe ayethule izolo ngoLwesithathu enkonzweni yomngcwabo kamakadebona wentatheli eyayiwumthwebuli wezithombe oqavile eNingizimu Afrika, uMnu Peter Magubane (91).
Kule nkonzo ebiseBryanston Methodist Church ngaseSandton, eGoli, kukhonjiswe ngezinye zezithombe eziqavile zikaMagubane azithwebula ngezikhathi zobandlululo.
Eduduza umndeni uRamaphosa, uthe kakulahlekelwe wona kuphela, kodwa kulahlekelwe isizwe sonke ngokudlula emhlabeni kukaMagubane. Uqhube wathi sengathi umndeni ungaduduzeka ngokwazi ukuthi umsebenzi wakhe kawunakushabalala.
Uthe izithombe ezathwetshulwa nguMagubane - eziveza unya nodlame lobandlululo - zaba nedumela emhlabeni wonke, kodwa eNingizimu Afrika wajeziswa ngokushaywa, ukuboshwa nokuvalelwa yedwa ejele izinsuku eziwu-586.
Uqhube ngokuthi naphezu kwayo yonke imizamo yokumqeda amandla okwenza umsebenzi wakhe nokuwudicilela phansi, akazange adikibale.
URamaphosa ephawula ngokuzimisela kukaMagubane ekwenzeni umsebenzi wakhe, uthe kuyavela ukuthi wayeze ashushumbise ikhamera yakhe, ayishutheke esinkweni noma ekhathonini lobisi ukuze akwazi ukuthwebula izithombe.
Uphawule nangokuthi ngaphandle kokuthi uMagubane wayehlalelwe ngowakhe umsebenzi okwakumele awenze, kodwa wayenesineke sokukwazi ukwelekelela ezinye izintatheli, okubalwa kuzo nezakwamanye amazwe ezazikuleli ngaleso sikhathi.
Uthe kunezithombe zikaMagubane eziqavile, ezaqopha imiphumela yesibhicongo saseSharpeville ngo-1960, izinxushunxushu zaseSoweto zango-1976, nezinye izigameko eziningi ezaphehlwa wumbuso kahulumeni wobandlululo.
Phakathi kwezicukuthwane abezethamele inkonzo kaMagubane, bekukhona noMnu Thabo Mbeki owayengumengameli wezwe.
UMagubane wasebenzela iphephabhuku iDrum, iphephabhuku iTime, iRand Daily Mail, neminye imithombo yabezindaba.
Wake waba ngumthwebuli kaMnu Nelson Mandela owaba ngumengameli wokuqala wentando yeningi eNingizimu Afrika.
Wahlabana ngenqwaba yezindondo ngomsebenzi wakhe oseqophelweni eliphezulu.