Imithetho yaseNingizimu Afrika ithambekele ezigebengwini
MHLELI: Ngiyafisa ukwazi ukuthi kungani iNingizimu Afrika inemithetho etotosa kakhulu abantu bokufika kuleli kanjalo nabephuli bemithetho.
Sihlezi sizwa kunconywa umthethosisekelo wakuleli kodwa kangiwuboni ukuthi muhle ngani ezakhamizini zakuleli. Lokhu ngikushiso wukuthi imingcele yakuleli iyazivuzela nje okwenza kube nabantu abaningi bokufika kuleli abangene ngokungekho emthethweni.
Ngiyacabanga ukuthi yingakho nobugebengu buphezulu ngokuxakile emadolobheni amakhulu ngoba umuntu ofike ngokungekho emthethweni kayikho enye indlela angaziphilisa ngayo ngaphandle kokuqhubeka nokwenza okungalungile ukuxosha ikati eziko.
Kangisho ukuthi ubugebengu bakuleli benziwa ngabantu bokufika kuphela ngoba nabawunsinsi wakuleli bayabenza. Yize abaningi bethi lokhu kudalwa wukusweleka kwamathuba emisebenzi, engingakuphikisi, kodwa ngixakwa wukuthi kunabantu abaningi abasebenza kahle esihlale sifunda ngabo ukuthi baboshelwe amacala okubulala okuhleliwe okungaba yizithandwa zabo, yizitha abasuke beziphindiselela
kuzona noma umbango wamafa okanye kube wubugebengu nje bokubamba inkunzi.
Esikhathini esiningi-ke uma isisulu sike sazivikela ngokuchitha igazi lomgulukudu kuqala, sisuke sesizilandele olukhulu utalatiya. Ngizibuza ukuthi umuntu uma engene ngendlela engafanele emzini wakho, kumele umqabule yini ukumkhiphela ngaphandle ngoba usuke evele ehlomile.
Phela usuke ekuqonda kahle kamhlophe ukuthi lokhu asuke ezokwenza kuwukwephula umthetho.
Kungani pho umthetho ungamvikeli umuntu okhipha umphefumulo ngoba evikela impahla yakhe kumbe umndeni? Kuyoze kube nini sifunda ngemindeni okusuke kuqothwe wonke amalungu ayo yimigulukudu engenabo onembeza?
Ngiyafisa sengathi kungaba khona okwenziwayo ukuze kuvikeleke ngokugcwele izakhamizi zakuleli ekugcwelezweni yimigulukudu imihla namalanga.