UZuma usefuna ihlandla lesithathu lokuhola izwe?
Uhambele amaNazaretha aseBuhleni eyocela umkhuleko
USALOBIZELA ukubuyela emandleni okuhola uhulumeni wakuleli uMnu Jacob Zuma (82) owayengumengameli waseNingizimu Afrika noweANC.
Ngokombiko weTimes Live, uZuma ubehambele umkhuleko webandla lamaNazaretha ohlangothini lwaseBuhleni abebuthanele entabeni engcwele iKhenana. Ngokwalo mbiko, uZuma uthe usafisa ukubuyela kuhulumeni ngoba kusenezinto okusafanele azilungise ezweni. Uthe washeshe wakhishwa engakawuqedi umsebenzi.
Uthi wakhishelwa ukuthi ulungisa umonakalo ngosizi lomuntu omnyama. UZuma uphathe uhulumeni wakuleli amahlandla amabili engumengameli wezwe.
NgoZibandlela (December) ngonyaka odlule wenze isimemezelo sokuthi ngeke ayivotele i-ANC, kunalokho uzokweseka iqembu elisha elisanda kusungulwa, uMkhonto Wesizwe (MK). Kusukela enze lesi simemezelo, uhambela izindawo eziningi ngenhloso yokukhulisa izibalo zabantu abajoyina iMK.
“Niyazi ngasheshe ngakhishwa ekubeni ngumengameli. Ngakhishelwa ukuthi ngilungisa izinto zomuntu omnyama.
“Indlela abaziphathe kabi ngayo, ngiphoqeleka ukuba ngikhuze ibuya. Yibuya-ke manje. Ngifuna ukulungisa usizi lwabantu abamnyama,” kusho uMsholozi.
UZuma unomlando omude ekuholeni uhulumeni wakuleli njengoba eke waphatha amahlandla amabili elandelana.
Waphatha izwe kusukela ngo2009, kwaze kwaba uyashenxa kuhulumeni ngo-2018. Ngaphambi kwalokho, wayekade eyisekela likamengameli wakuleli, uMnu Thabo Mbeki kusukela ngo-1999 kuya ku-2005.
Kuyinto eyaziwayo ukuthi waphuma engathandi esikhundleni sokwengamela izwe emuva kokuba ubuholi kuKhongolose buwele kuMnu Cyril Ramaphosa oseqhoqhobele izintambo zombuso.