KUNCONYWE IGALELO LIKA-KEVIN DE BRUYNE

UNCOME amagalelo kaKevin De Bruyne (osesithombeni) uMicah Richards owayengumdlali weManchester City yase-England egile izimanga ibuya sekuvalwe amehlo igugisa ngo-3-2 iNewcastle United.

Ziye ekhefini iNewcastle ihamba phambili ngo-2-1 emva kokulandela ngemuva umdlalo usaqala.

UDe Bruyne obengabonakali emdlalweni yeCity ngenxa yokulimala ungene kulomdlalo esuka ebhentshini wafika washaya igoli waphinda waba nesandla kwelesithathu.

“Bonke abantu balokhu bezibuza ukuthi ngabe iCity iseyiqembu elifanayo naleli elinqobe zonke izicoco ngesizini edlule.

Ngikholwa ukuthi kusenjalo uma ubheka indlela abadlala ngakhona muva nje.

Ngiyazi ukuthi kukhona la bebengenzi kahle nokuyinto ejwayelekile kuwona wonke amaqembu.

Uma unomdlali ofana noDe Bruyne eqenjini lakho kufanele uhlale ukulindele ukunqoba.

Ungumdlali osezingeni lakhe yedwa izinto azenzayo enkundleni zikushiya umangele.

Ngeke usho ukuthi ubelimele. Angingabazi ukuthi lokhu akwenzile kuzomenza ukubuyelwe ukuzethemba aqhubeke nokwenza imilingo yakhe. Ngendlela obekubaluleke ngakhona ukuthi iCity iwunqobe lomdlalo ubona ngisho injabulo abayikhombise emva komdlalo ukuthi bebewadinga kanganani lamaphuzu njengoba bezimisele ngokunqoba lendebe ihlandla lesine kulandelana “kusho lomdlali owayeyibamba emuva ngezikhathi zakhe. Umdlalo olandelayo weCity izowugijima neTottenham koweFA Cup ngomhla ka-26 kwephezulu.

Ngokunqoba lomdlalo abafana bakaPep Guardiola ongumqeqeshi bazibeke ethubeni lokugudluza iLiverpool esesicongweni kwazise basele ngamaphuzu amabili emdlalweni ewu-20 esadlaliwe.

Kuzokhumbuleka ukuthi nyakenye babuya ngendlela efanayo ngenkathi begudluza i-Arsenal eyayibukeka isethubeni lokunqoba lesicoco ngesizini edlule.