Ishiywe wumqeqeshi yanqoba iSharks
Kushayisa amakhala ukulibangisa kwelakubo kukaPlumtree obhinjelwa wuhlelo
UBONA kuzobalekelela kakhulu ukwenza kahle emdlalweni wabo wangempelasonto uNeil Powell obambe njengomqeqeshi weSharks eguqise i-Oyannax yaseFrance ngo-38-7 kowe-EPCR ngoMgqibelo eHollywoobets Kings Park Stadium, eThekwini.
ISharks iye kulo mdlalo imisila ingaphansi kwemilenze emuva kokwehluleka ukunqoba kwiLions ngeledlule phezu kokuba yayihamba phambili ngesiwombe sokuqala kulowaya mdlalo we-United Rugby Championship (URC).
Osokhaya baye kulo mdlalo ngaphandle komqeqeshi wabo uJohn Plumtree olibangise kwelakubo eNew Zealand ngoba ekhala ngesimo esingesihle emndenini wakhe okuyinto eshayisa abantu abaningi ngamakhala kwazise nemiphumela ibukeka imuphika.
“Kube kuhle ukunqoba lo mdlalo emuva kokungenzi kahle emidlalweni yethu edlule. Ngikholwa wukuthi ukunqoba lo mdlalo kuzosisebenzela kakhulu emidlalweni yethu ezayo.
“Sibe nomdlalo omuhle nakuba besingadlali neqembu eliqinile ngoba bebengafikanga neqembu labo eliphelele (izingwazi).
“Sizosebenzela kulokhu esikuthole kulo mdlalo njengoba sizolibangisa eWales lapho esizobhekana khona neDragons.
“Okuhle nje wukuthi udonga lwethu lwasemuva lukhombise ukuzimisela kakhulu uma kuqhathaniswa nasemidlalweni edlule ngoba singenelwe yi-try eyodwa okukhomba
ngokusobala ukuthi kukhona okuhle esikwenzile kulo mdlalo.
“Nakuba sinqobile kodwa kusekuningi okusamele sikwenze ukukhuphula umdlalo wethu. Kuyinto enhle kakhulu ukuhlala emaqenjini aphezulu kwi-log ngoba lokho kwenza ukuba uthole ithuba lokudlalela imidlalo yemikhumulajezi ekhaya,” kusho uPowell.
Ngokunqoba lo mdlalo iSharks idlulele emzuliswaneni olandelayo okwenza anyuke amathuba okudlalela imidlalo yayo yemikhumulajezi yalo mqhudelwano ekhaya. hudla2ilanganews.co.za