Bafuna u-R14 million ngomataniswa neChiefs neBucs
Isikhulu kuthiwa sicuphe nokubona ukuthi i-Afcon ngeke yini imwezele phesheya lo mdlali
SIFUNA u-R14 million isikhulu sePolokwane City ngomdlali wale kilabhu - oke wasikaza ukuliyeka ibhola ekhala ngokuthi liyamhlukumeza osekuvela ukuthi ugaqelwe yiKaizer Chiefs ne-Orlando Pirates.
U-Oswin Appollis (22) ujoyine iPolokwane ngo-2022 esuka kwiPretoria Callies. Ubekade elandwe ngumqeqeshi uKwanele Kopo omazela enkulisa yeSuperSport United abengumqeqeshi wayo.
Umlanda nje lo mdlali ubesenqume ukuliyeka ibhola ekhala ngokuthi liyahlukumezana.
Nokho selokhu ejoyine iPolokwane ugila izimanga njengoba edlala ibhola elinenkosi phakathi. Indlela adlala ngayo imphendlele indawo eqenjini lesizwe lakuleli, iBafana Bafana elisemqhudelwaneni we-Africa Cup of Nations (Afcon), oqale ngoMgqibelo e-Ivory Coast.
Lo mdlali kuvela ukuthi usezihehele iso leChiefs neBucs. Leli phephandaba lihoshe ngemithombo yalo ukuthi umnikazi wale kilabhu, uJohnny Mogaladi, usekubeke kwacaca ukuthi omfunayo kuzofanele ahlukane no-R14 million.
“Udaba lwalo mfana luyamangaza ngoba ubesethi uyaliyeka ibhola, wabuyiswa ngumqeqeshi uKopo.
“Manje wenza kahle kangangoba usehehe iso leChiefs nePirates. UMogaladi akenqabi naye kodwa ukubeke kwacaca ukuthi omfunayo makabeke etafuleni u-R14 million.
“Uthi ngeke ame endleleni yakhe ngoba vele nekilabhu yakhe iyayidinga imali njengoba ingenabaxhasi.
“Kodwa-ke usamise yonke into njengamanje njengoba lo mdlali ekwi-Afcon, ulinde ukubona ukuthi kuzokwenzekani, akafuni ukuxhamazela.
“Phela kulo mqhudelwano kusuke kuphelele izinhloli eziqhamuka emhlabeni wonke jikelele, yingakho engafune kuxhamazela,” kusho umthombo.
Imizamo yokuthola uMogaladi iphunzile njengoba ucingo lwakhe belukhala kodwa lungabanjwa.