Uhlelo olusha lokubhalisa izimoto luwukucima umlando
MHLELI: Mangisike elijikayo mayelana nesinqumo sikahulumeni wesifundazwe saKwaZulu-Natal, oholwa yiqembu likaKhongolose, sokwethula uhlelo olusha lokubhaliswa kwezinombolo zezimoto (number plates), nokuyisinqumo inhloso yaso kuwukucima umlando.
Kuyiqiniso elingephikwe ukuthi ukuqambeka kwezinombolo zezimoto ezibhaliswe ngazo, iningi lazo laqambeka ngokwezindawo ezingaphansi kwamakhosi amadala ezizwe ezahlukene avelayo nasemlandweni.
Ngokomlando, kulezi zindawo kwakunezigodlo zawo amakhosi, bese kuthi kwezinye izindawo kwenzeka izigigaba, ezinye zazo ezagcina ziholela ekusungulekeni kwamagama azo, lezo zindawo kusukela ngezikhathi zasendulo.
Uma ngenza isibonelo nje, izimoto zaKwaNongoma (eHlalankosi) zibhaliswe ngezinombolo ezithi, NND, okwakuyisigodlo seNkosi uZwide waKwaNdwandwe, bese kuthi ezingaphansi kwamadolobha akhele isifunda soMkhandlu dolobha weTheku njengeVerulam, uThongathi njalo njalo zona zibhaliswe ngezinombolo ezithi, NJ okumele uJohn Langalibalele Dube.
Ngokushintsha izinombolo kusobala ukuthi kucinywa umlando walezi zibongo. Kudela owaziyo ukuthi zona izingwevu zalezi zibongo esengizibalulile zalunywa yini indlebe ngalesi sinqumo, ngoba ukushintsha umlando wanoma ngubani noma isiphi isibongo, kukhombisa indelelo nokubukela phansi leso sibongo.
Kucace bha kuhle kwekati elimhlophe ehlungwini ukuthi uhulumeni kaKhongolose uhlose ukuzibhalela owawo umlando kabusha abantu abangawazi.
Isizathu uhulumeni kaKhongolose osibekayo sokwethula lolu hlelo, ubeka izaba zokuthi kuzoncipha ubugebengu ngoba akulula ukuthi kube khona ukukokotela izinombolo zezimoto ezibhaliswe ngazo ngenxa yobuchwepheshe besimanje ezakhiwe ngabo. Esinye isizathu wukukhula kwesibalo sabantu esifundazweni okuholele ekutheni kwenyuke nomthamo wezimoto.
INkatha iyakholelwa ekutheni kalukho ucwaningo oluwubufakazi obuqanda ikhanda bokuthi ngempela ukushintshwa kwezinombolo zezimoto ezibhaliswe ngazo (number plates) kwehlisa izinga lobugebengu.
Uhlelo lwangaphambilini obelusetshenziswa kufanele luqhubeke lusebenze bayekwe abanikazi bezimoto ezivele sezabhaliswa kudala bangaphoqwa ukuthi bashintshiswe.
Abanikazi bezimoto ezintsha abazithenge sekwethulwe uhlelo olusha, kufanele kube yibona abangena ngaphansi kwalolu hlelo olusha ngoba akukho zindleko eziphindiwe abazongena kuzona.
UMnyango wezokuThutha oholwa nguMphathiswa uSipho Hlomuka, wathatha lesi sinqumo budlabha, ngaphandle kokucabangela abanikazi bezimoto okufanele bakhokhe futhi uma beshintshela kulolu hlelo olusha, nakuba ngaphambilini base bevele bekhokhile.
Abanikazi bezimoto eningizimu neKwaZulu-Natal, baphoqwa ukuthi bakhokhe kabili njengoba ngesikhathi kuhlanganiswa amadolobha amanye efakwa ngaphansi kwamanye, kwathiwa mabashintshe basebenzise izinombolo zezimoto iNSC. Njengoba manje futhi sekungene lolu hlelo olusha sekufanele futhi bashintshe wona lo NSC, basebenzise izinombolo ezintsha okuyizindleko ezingenasidingo ezizuzisa uhulumeni kaKhongolose kuphela, esikhundleni sokuthi kuzuze abanikazi bezimoto.
INkatha iphonsela inselelo uMphathiswa uHlomuka ukuthi makaqinisekise ukuthi abanikazi bezimoto bayanxeshezelwa ngandlela thile noma babuyiselwe imali yabo ikakhulukazi labo abase bebhalisile phambilini.
Bese etshela izwe ukuthi yiziphi izinhlelo ezikhona zokuqinisekisa abakushoyo ukuthi izinombolo zezimoto ngeke zisakokotelwa.
Ikhishwe: nguMnu Blessed Gwala, uMholi weQembu leNkatha eSishayamthetho saKwaZulu-Natal