KUGXABHA ISISU KOWASE-GHANA ENGAQALANGA KAHLE KWI-AFCON

KUGXABHA isisu kumqeqeshi weqembu lesizwe laseGhana njengoba libhekene nomdlalo ongase ucacise ngekusasa layo kwi-Africa Cup of Nations (Afcon) eqale ngeledlule e-Ivory Coast.

IGhana izobhekana ne-Egypt koka-group B namuhla ngoLwesine ngo-22h00. IGhana iwuvule kabi lo mqhudelwano iguqiswa yiCape Verde ngo-2-1.

I-Egypt yona ibambane ngo-2-2 neMozambique.

Ukuhlulwa kweGhana kuyibeke engcupheni njengoba kufanele iwunqobe kumnyama kubomvu lo mdlalo kwazise iyona kuphela esahluliwe kuleli qoqo.

Ibambe ibhuleki kuleli qoqo okuyinto ebingalindelekile.

UChris Hughton ololonga iGhana uthi kugxabha isisu uma ecabanga ngalo mdlalo we-Egypt kwazise kufanele noma kanjani bawunqobe. Sigxabha isisu kufanele njengoba kuvela ukuthi emuva komdlalo weCape Verde uhlaselwe ngumlandeli esho ukumudla luhlaza.

“Wumdlalo omkhulu kithina lona okufanele noma kanjani sibuye nokuthile kuwona. Sinaso isipiliyoni sokukwenza lokho abadlali esinabo baseqophelweni eliphezulu.

“Uma ubuka iSenegal, emqhudelwaneni owedlule idlale ngokulingana imidlalo yayo emibili yokuqala esigabeni samaqoqo bawina owokugcina ngakhoke yibhola leli kwenzeka noma yini. Lo mdlalo uzoba nzima kodwa kufanele siwunqobe,” kusho uHughton.

Uthi kulo mdlalo weCape Verde babulawe ngamaphutha abawenzile.

“Ukuhlulwa kwethu kudalwe ngamaphutha esiwenzile nathi saphinde sangawuqala umdlalo ngendlela njengoba bona benzile. Sinabadlali abahle kodwa nabo bangabantu bayawenza amaphutha. “Ngikholwa wukuthi njengoba siya kulo mdlalo amaphutha siwalungisile ngeke abonakale ngoba awafuneki. Sidlala neqembu eliyingozi iphutha elilodwa olenzayo liyakujezisa,” kuphetha uHughton.