UNGQONGQOSHE UTHI NGEKE ZIWUTHOLE USHWELE IZIBOSHWA EZINGAFUNI UKUFUNDA
THANDOLUHLE NGUBO
UNGQONGQOSHE wezokuHlunyeleliswa kweziMilo kuzwelonke uMnu Ronald Lamola uveze ukuthi ukufunda sekuzoba ‘yimpoqo’ emajele akuleli njengoba kuzolungiswa inkinga yokuthi abebeboshiwe bangaqasheki ngenxa yamarekhodi obugebengu (criminal record).
Uthi uMengameli wezwe uMnu Cyril Ramaphosa kulindeleke ukuba asayine umthetho obuyekeziwe weJudicial Amendment Bill, ezosula amarekhodi obugebengu ngesikhathi isiboshwa sikhululwa ejele, noma ngemuva kweminyaka ethile sikhululiwe.
Ukusho lokhu ngesikhathi kuhalaliselwa iziboshwa ezenze kahle kumatikuletsheni ejele laseWestville, ngoLwesibili.
ULamola ukusho lokhu ngemuva kokuvela kwezikhalazo eziveza ukuthi nakuba iziboshwa zifunda emajele, kodwa zithwala kanzima uma sekumele ziqashwe nemfundo yazo, ngoba izinkampani ezizimele nalezo zikahulumeni zibhekisisa ukuthi lowo ezimqashayo akanalo yini leli rekhodi.
“Umengameli uzowusayina maduze lo mthetho ogunyaza ukusulwa kwamarekhodi ngale kokulandela yonke le migudu elandelwayo njengamanje.
“Angikucacise ukuthi ukusulwa kwamarekhodi kuzoshiyana ngohlobo lwamacala abazobe bebhekene nawo. Kulamacala amancane amarekhodi akhona azosulwa ngesikhathi abaphuma ngaso ejele. Laba abavele abanawo (amarekhodi amacala amancane) azosulwa ngesikhathi okuzosayina ngaso umengameli. Kulawa athanda ukuba bucayi ukusulwa kwamarekhodi kuzohluka ngokwezigaba. Isigaba ngasinye sizoba neminyaka ethile ezohlolwa isiboshwa esikhululiwe ngaphambi kokusulwa kwerekhodi laso.
“Ngalokho-ke wonke umuntu osejele kumele afunde, lokho kunganciphisa nobugebengu obenzeka emajele,” kusho uLamola.
Uthi uyakuqonda ukuthi ngeke baphumelele bonke abantu ngemfundo, yikho nezifundo zamakhono zizoba yingxenye yalezi ezizofundwa yiziboshwa. Uthe kuzophinde kukhulise nomnotho wakuleli futhi iziboshwa ngeke zibuyele ebugebengwini uma ziphume ejele nekhono elithile. Ugcizelele ukuthi nakuba lilincane inani leziboshwa eziqashekayo uma ziphuma ejele, kodwa awukho umthetho othi azingaqashwa uma seziphumile.
“Angikusho ukuthi inani labantu abaqashiwe bephuma emajele lincane kakhulu. Nathi siwuMnyango wokuHlunyeleliswa kweziMilo akukho esingakwenza ngalokho ngoba uhlelo lokuqasha ezinkampanini luyimfihlo yangaphakathi, yikho-ke sigqugquzela ukuthi iziboshwa zifundele nezifundo zamakhono, ezifana nokwakha izindlu, ukulungisa ugesi namanzi nokunye. Lokho kuyokwenza ukuthi noma sezingaphandle ngemuva kwesigwebo sazo zingabuyeli ebugebengwini ngoba ziyobe zinayo indlela yokuphila,” esho.
Uveze ukuthi uma sekusayinwe lo mthetho, ngeke asisayine isicelo sokuphuma ngoshwele sesiboshwa uma singekho isitifiketi semfundo esisizuzile ngesikhathi sidonsa isigwebo saso. Ube esebongela iziboshwa ebezenza umatikuletsheni ngempumelelo yazo, wazitshela ukuthi azilisebenzise leli thuba le mfundo ngoba zizophepha kokuningi okwenzeka emajele. Uthi le mfundo abazohlomula ngayo yiyo ezozenza zemukeleke kalula emiphakathini yazo. “Ngizoqinisekisa ukuthi umuntu othola ushwele ngonesicucu esithile semfundo. Akukwazi ukuthi ungahlala iminyaka engu-20 kodwa ungaphumi nasicucu semfundo. Lokho kusho ukuthi uma uphuma uyoba uhlupho emphakathini, ngalokho-ke ngizolijikisa ifayela lesiboshwa esingena sicucu, libuye mhla sathola noma isitifiketi esisodwa. “Umatikuletsheni wakulonyaka usebenze kakhulu, uliphakamisile ifulegi lomnyango wethu. Le mfundo eniyithole lapha niyisebenzise, yiyo eyovezela imiphakathi ukuthi senishintshe ngempela,” kusho ungqongqoshe. Uncome nabesifazane obekungokokuqala isikole sabo sikhipha umatikuletsheni njengoba saqalwa ngo-2021. Uveze ukuthi okwenze sivulwe ngemuva kwesikhathi eside wukuthi ababaningi abesifazane abasemajele, futhi iningi labo lifundile uma liqhathaniswa nabesilisa.
Uthe namacala abawenzayo akhombisa kona ukufunda njengoba ucwaningo luveza ukuthi abaningi baboshelwe amacala okukhwabanisa. Ube esencoma iKwaZuluNatal ngokwenza kahle nokukhiqiza imiphumela emihle ezikoleni zasemajele njengoba eveze ukuthi zingu-6 izikole ezitole o-100% kule miphumela. Njengamanje iziboshwa ziyakwazi ukubhalisela ukusulwa kwamarekhodi azo obugebengu ngaphansi komthetho i-Expungement of Criminal Records, ngaphansi kwesigaba u-51 ka-1977 somthetho wokuqulwa kwamacala obugebengu (Criminal Procedure Act).
Ohlelweni lwamanje abangeke bakwazi ukubhalisela ukusulwa kwamarekhodi, engakapheli iminyaka ewu-10 bagwetshwa, okutholakala amagama abo ohlwini lwamacala ocansi noma okuhlukumeza abantwana, nalabo abatholwa benamanye abacala ngaphambi kokuphela kwemiyaka ewu-10 bagwetshwa, kanti abanama-record balinda izinyanga ezintathu ngemuva kokubhalisela ukusulwa kwerekhodi.