ISILO SITHI KABEKHO ABANTU ‘ABANAMANGA NJENGOSOPOLITIKI’
SIBAQHATHULULE phambi kwezihlwele osopolitiki iSilo sesizwe samaZulu, uMisuzulu kaZwelithini, iNdlulamithi, sathi kasifuni bangene endleleni yaso ngoba naso ngeke singene kweyabo.
“NgingumZulu mina, kangingeni kwipolitiki,” kusho iSilo. Besikhuluma ngempelasonto emcimbini wokukhunjulwa kwempi yaseSandlwana yangomhla ka-22 kuMasingana (January) ngo1879, lapho kwakutholene phezulu uZulu namaNgisi.
Sigxeka osopolitiki kule nkulumo yaso iSilo sithe: “Ey’ abekho abantu abanamanga njengalaba bantu bepolitiki. Bathembisa izinto ezingekho.”
Sexwayisa ngosopolitiki ezinkumbini zabantu ebezethamele lo mcimbi, sithe: “Uyabona njengoba ziya okhethweni manje, abazukunikhohlisa...! Angisho ukuthi nibavalele iminyango uma bezongqongqoza ezindlini zenu. Nibezwe kodwa akusho ukuthi balaleleni”.
Nakuba sikhulume kanje ngosopolitiki, kodwa siphinde saxolisa, sathi kasibazondi.
“Ngiyaxolisa nina bepolitiki, angisho ukuthi ngiyanizonda - ngiyanithanda kodwa nje yindlela yenu enisebenza ngayo engingayithandi,” kusho iSilo.
Phakathi kosopolitiki abebekhona kulo mcimbi, abebehleli esiteji naso iSilo, kubalwa uNdunankulu wesifundazwe uNkk Nomusa Dube-Ncube, nguMnu Velenkosini Hlabisa onguMengameli we-IFP, ngoNgqongqoshe okubalwa uDkt Ntuthuko Mahlaba wezemiDlalo, ezobuCiko namaSiko, noNkk Bongi Moloi-Sithole wezokuBusa ngokuBambisana nobuHoli boMdabu esifundazweni, neMeya yaseMzinyathi uMfundisi Petros Ngubane.
Kukuwo lo mcimbi lapho simemezele ukuthi siqoke uMfundisi Thulasizwe Buthelezi oyiMeya yaseZululand, ukuba abe nguNdunankulu wesizwe samaZulu, neNkosi yasemaDungeni, uPhathisizwe Chiliza kweseSekela likaNdunankulu wesizwe.
Sigcizelele ukuthi isinqumo esisithathile sokuqoka undunankulu omusha nesekela lakhe, kasihlangene nepolitiki.
“Lezi zikhundla nina beSilo nami ngizobe ngizigadile,” sisho.