UNGQONGQOSHE UXHASE ISIKOLE ESIPHASE KAHLE UMATIKULETSHENI
UZIBOPHEZELE ngezinsiza zokweseka isikole esenze kahle emiphumeleni kamatikuletsheni uNgqongqoshe wezeMfundo KwaZulu-Natal, uNkk Mbali Frazer.
Ungqongqoshe uthembise ukweseka Ivelabahleke High School, yaseMlazi, eThekwini emcimbini wesikole wokuklonyeliswa kwabafundi baso abenze kahle.
Uveze lokhu ngoMgqibelo e-Inkosi Albert Luthuli Internantional Convention Centre (ICC), eThekwini. Phakathi kwezipho azozinika isikole, ngama-desk awu-150, namagumbi amabili angomahambanendlwane.
Uthishanhloko wesikole uMnu Bheki Mhlongo, ucele ama-desk kungqongqoshe.
“Ngiyawubonga umsebenzi wenu omuhle eniwenzayo eVelabahleke. Ngiyathembisa ukuthi ama-desk azofika nezindlu ezingomahambanendlwane.
“Ukusebenza kwenu ngokuzimisela kubonwe yizwe lonke. Ukukhiqiza kwenu ama-bachelor amaningi kusenze saziqhenya ngenxa yomnikelo wenu njengoba kulo nyaka silele isibili ezifundazweni zonke ngokwenza kahle kumatikuletsheni wanyakenye, nani niphose kakhulu esivivaneni,” kusho uNkk Frazer.
Ukhuthaze othisha ngokuthi bangadikibali ngokwehla kwesikole ku-100%. Uphawule ngalokhu emuva kokuba uthishanhloko ekhale ngokuthi bayawenza nje lo mgubho kodwa zibuhlungu izinhliziyo zabo ngenxa yomfundi oyedwa ongaphasanga.
Kulesi sikole kubhale abafundi abawu-254, kwaphasa abawu-253 okwenze sathola u-99.6%. Ungqongqoshe uthe kunezikole ezijabule okubhale kuzona abafundi abawu-6, baphasa bonke.
“Ziningi kakhulu izingane eniziphasisile eVelabahleke. Ukugubha lolu suku lokwenza kahle kwenu nabantwana, kunifanele,” esho.
Ungqongqoshe unxuse abafundi ukuba baqhubeke nokwesaba othisha babo noma ngabe sebesezikhungweni zemfundo ephakeme.
Uthi lokho kuyokwenza ukuthi ezifundweni zabo baphase ngamalengiso.
“Namanje kangikhohlwa ngamazwi kathisha wami waseWeneen High, ngoba yiwona awangibeka kule ndawo engikuyona njengamanje ngokwempilo. Uma nizokhumbula amazwi ebeniwa-tshelwa ngothisha benu, nizophasa kahle emanyuvesi, niyeke ukulandela ubumnandi obenziwa khona.
“Iziqu zeDegree zifundelwa iminyaka emithathu kuya kwemine, ngodokotela kuphela abafunda iminyaka ewu-7. Ngakhoke kuzomele iziqu zenu niziphothule eminyakeni emithathu kuya kwemine,” esho.
Uthishanhloko wesikole ubonge umsebenzi wothisha nokuzimisela kwabafundi bakamatikuletsheni bangonyaka odlule. Uthi ukusala endleleni komfundi oyedwa, akubethusanga ngoba bayibonile inkinga yakhe unyaka uqalwa.
Uthi bayenzile imizamo yokuxhumana nomzali wakhe nokuzama usizo lokumlekelela. Lo mcimbi uxhaswe yiVelabahleke Foundation, yiTranset ngezithuthi zabafundi ukuya emcimbini, yiM.N.I cars, T.S.W ngama-laptop, eThekwini Parks and Recreation, iBet Soft Ware ngama-laptop, inkampani iCHS Development ngokuqasha indawo yomcimbi i-ICC, iGOMZ Holding ngama-laptop nabanye.