BAZOCIJWA NGEZOBUCHWEPHESHE KUBUYISELWA EMPHAKATHINI
BAZOCIJWA befika emabangeni aphakeme abafundi baseMountview Secondary School, ezifundweni zobuchwepheshwe.
Lokhu kugqanyiswe kulesi sikole eVerulam, eThekwini kwethulwa i-laboratory yeCoding neRebotics ngoLwesithathu.
AbakwaShoprite Foundation, banikelele lesi sikole ngalesi sakhiwo ngenhloso yokuthi kuqeqeshwe abafundi besakhula, emabangeni aphakeme.
Isikhulu esiphezulu sakwaShoprite, uNkz Maude Modise, sithi lokhu abakwenzile kulesi sikole, kuyingxenye yokubuyisela emphakathini.
Sitshele abezindaba ukuthi bazimisele ngokubona intsha yakuleli ikhula kwezobuchwepheshe nesayensi, ukuze ifane neyakwamanye amazwe.
“Ukubuyisela emphakathini sikubeka eqhulwini kwaShoprite, yingakho iFoundation igxile kakhulu ekuhlonzeni izinto ezibalulekile ezidingwa wumphakathi wakithi kuleli lizwe, ikakhulukazi emfundweni.
“Sinenthemba lokuthi umnikelo esiwenzile uzothela izithelo ezinhle,” kusho uNkz Modise.
Uveze ukuthi ukuhlelwa kwelaboratory nezinsiza eziphakathi, kube yizindleko zemali engangoR1.6 million.
Uthi bazoqhubeka nokweseka imfundo ngezinsiza ikakhulukazi ezikoleni ezisemakhaya nasemalokishini.
Le nkampani inikele nangekhishi elinezitofu elizosetshenziswa ngabafundi bomkhakha wakwaConsumer Studies.
Ngakolunye uhlangothi, uNkz
Xoliswa Mahlangu wenkampani iSfiso EDtech, okuyiyona eyenza uqeqesho lwalesi sifundo, uthi kuzoqala ngoNdasa (March) ukuqeqeshwa kothisha.
Uthi kudingeka izinsuku eziyisihlanu ukuqeqeshwa kothisha ngaphambi kokuba kudlulelwe esigabeni sabafundi.
“Abantwana sifuna baqhamuke nezinto ezizoba wusizo kuleli lizwe, bafunde amakhono e-internet, ukwakha i-website nokunye.
“Lolu xhaso silwenza kakhulu emabangeni aphansi ukuze abantwana bakhule namakhono,” esho.
Uthi balungiselela ukuthi uma kwenzeka uhulumeni elwethula ngokusemthethweni lolu hlelo ngonyaka ka-2025 kusomqulu womthethosisekelo wezikole zonke kuleli, kube sekukhona okutshaliwe kubafundi.
“Lesi sifundazwe sisilele emuva kakhulu ekuhlolweni kwalolu hlelo lwezifundo. Esifundazweni iGauteng zilinganiselwa ku-115 manje izikole eseziqalile ukwenza iCoding,” kusho uNkz Mahlangu
Lesi sifundo sizokwenziwa kwaGrade 8 no-9 kuphela. Omunye wabafundi bakulesi sikole, u-Andiswa Mbokazi, uthi bajabule ngokubekwa eqhulwini ohlelweni lwalezi zifundo.
Uthishanhloko uMnu Indrn Govender, uthi ezifundweni ezenziwa kuleli banga okubalwa kuzona iComputer Application Technology, ne-Information Technology, kuzolekelela ukufika kwalolu xhaso ekukhuliseni abafundi kuzona.
Ubonge ukwesekwa kwesikole sakhe ngabakwaShoprite.