Ungqongqoshe unikele ngemifundaze nomfaniswano
ULULE isandla kubafundi abangaphezulu kuka-150 uNgqongqoshe wezokuBusa ngokuBambisana nezoMdabu KwaZulu-Natal, uNkk Bongiwe Sithole-Moloi (osesithombeni), ngoLwesihlanu ngesikhathi enikelela abafundi bezikole ezahlukene ngomfaniswano.
Phakathi kwezikole ezihlomulile kubalwa Ekucabangeni Secondary, iZicole Secondary, uMgazi Secondary School, yiNtoyethu Primary neNkosi Thathezakhe Special School, zonke ezingaphansi kukaMasipala iNquthu.
Uthe inhloso enkulu yalolu hlelo wukulekelela abafundi abangaphansi kwalo masipala naye aphuma ngaphansi kwawo, ngomfaniswano nokunikezela nangemifundaze kwabanye babafundi abebenza umatikuletsheni ngo-2023.
Abafundi abawu-15 abebephume ezikoleni ezintathu bahlomule ngemifundaze egcwele njengoba bengabanye babaphase kahle futhi bavumeleke ukuthi bangafunda kunoma yisiphi isikhungo semfundo ephakeme. Uphinde wakhulumisana nezigungu zabazali nothisha, ebabonga ngemisebenzi emihle abayenzayo njengoba lezi zikole zamabanga aphakeme zenze kahle.
Akagcinanga lapho; uphinde wadlulisa nenkulumo eyakhayo kubafundi njengoba kuqala unyaka, ebakhuthaza ukuba basebenze ngokuzikhandla.
“Ngiyazi ukuthi kubuye kube khona lapho oyeka khona ngokungabi nezinsiza kufunda ezanele kodwa ngiyazibophezela ekutheni sizozama ukukulungisa lokho, nilekeleleke kwenikudingayo ukuze nifunde kahle.
“Ngesikhathi ngizibophezela ekulekeleleni lezi zikole, umbono wami omkhulu kwakuwukubona abafundi abaphuma kuzona benza kahle futhi bazibone bebalulekile.
“Siyaziqhenya kakhulu ngemiphumela yenu nangokusebenza kwenu ngokuzikhandla.
“Okunye esikufisayo wukuthi noma ngabe umfundi uphuma ekhaya elinjani, kodwa angathi uma efika esikoleni azibone ehlukile kunabanye, kepha kube yilapha ekhululeka khona, akhohlwe yisimo asishiye emuva.
“Uhulumeni wethu ukubeke eqhulwini ukwesekwa kwabafundi kusukela emabangeni aphansi kuze kuyofika kumatikuletsheni,” kusho uNkk Sithole-Moloi.
Uthi ukunikezelwa kwabafundi ngemifundaze bakwenzele ezikoleni ukukhuthaza abafundi abenza uGrade 11 no-12 ukuthi babone ukuthi uma besebenza ngokuzikhandla, nabo bangazithola bese thubeni lokuthola imifundaze.