KUKHUZWE IZISEBENZI KUMASIPALA WASEMHLATHUZE
ZIZOKHONJWA indlela izisebenzi zomkhandlu uMhlathuze, eRichards Bay okungenzeka zibanjwe oqotsheni zigila umkhuba wokuntshontsha udizili womkhandlu.
IMeya uMnu Xolani Ngwezi, ithe sekungamahlandla amaningi lo mkhandlu uzithola sekufanele ukhokhe imali ebalelwa ngaphezulu kwezigidi, ukhokhela udizili okungaqondakali ukuthi use-tshenziselwe ukwenzani.
Lo mholi nozakwabo bebezokwethula umbiko ngokusebenza nesimo semali yawo ngesikhathi kubanjwe isithangami sabezindaba emahhovisi alo mkhandlu ngoLwesibili.
UNgwezi uthe kuningi okungalungile okwenziwa yingxenye yezisebenzi zalo mkhandlu ngenhloso yokuba kuvele isithombe esingesihle ngomkhandlu. “Ngikhuluma nje kumanje kuyenzeka umkhandlu uzithole kufanele ukhokhe imali engaphezulu kuka-R6 million ngodizili nje uwodwa.
“Ngifuna ukuba ngikusho ngaphandle kokunanaza ukuthi izisebenzi ezizotholakala zintshontsha udizili, zizoxoshwa. Kuningi ukuganga okwenzekayo lapha ngenxa yabantu abafuna ukuzihlomulisa bona.
“Abanye balimaza izimoto zomkhandlu ngoba benolwazi lokuthi kuzoqashwa izimoto zabo kube yizona eziqhubeka nomsebenzi.
“Inkinga esibhekene nayo iyefana nenkinga ebhekene nenkampani kagesi njengoba nakhona kuyaziwa ukuthi ukuntshontshwa kwamakhebuli kuhlomulisa abathile,” esho.
Uthe lo mkhandlu kawungeni kwizivumelwano ezisuke ziphakathi konogada nabaqashi babo abasuke benezinkontileka nomkhandlu.
“Thina sikhuluma nomnikazi wenkampani. Uma kunezikhalo zokungaziholeli izisebenzi, siyambiza sikhulume naye.
“Uma ehluleka siyayinqamula inkontileka, siqashe enye inkampani ngoba uma siyiqasha, sifuna ukuthi ibe inayo imali yokuholela izisebenzi okungenani izinyanga ezintathu.
“Kuyakhathaza-ke nokuthi kunabantu abaphume umkhankaso wokubhala kabi ngathi ezinkundleni zokuxhumana, futhi kubhalwa okungelona iqiniso.
“Umkhandlu uMhlathuze usesimeni esihle kakhulu semali nokuphathwa kwayo kodwa kukhona abathi kasinayo imali. Akulona iqiniso lelo,” kuphetha uNgwezi.