Ujabulela ukuvaleka kwemilomo yabathandi beBafana
UJABULELA ukuvaleka kwemilomo yabalandeli bakuleli abebegxeka ukuqaliswa kuka-Evidence Makgopa (osesithombeni) imidlalo yeBafana Bafana uHugo Broos ongumqeqeshi waleli qembu eligile izimanga lidlulela kumaquarter final eCaf Africa Cup of Nations (Afcon) eqhubeka e-Ivory Coast yize belingathenjwa kuleli.
Lokhu likwenze ngesitayela likhipha iMorocco engunombolo 1 ohlwini lwamazwe avelele e-Afrika. Inqobe ngo-2-0 wamagoli ashaywe nguMakgopa ngomzuzu ka-57 noTebogo Mokoena ngesikhathi somusa kanondweba.
IBafana izobhekana neCape Verde kwi-quarter final ezokuba ngoMgqibelo ngo-22h00.
Emuva kwalo mdlalo uBroos utshele abezindaba ukuthi konke sekulele kubadlali bakhe ukuqhubekela phambili kulo mqhudelwano, baziqophele owabo umlando kwi-Afcon.
“Kuyangijabulisa ukuthi abadlali engabaqoka bayakhombisa ukuthi ngabafakelani esikwatini yize abanye bebenganikwa lutho ngabalandeli baseNingizimu Afrika.
“Buka nje uMakgopa uyakhombisa ukuthi ukulungele ukuba yingxenye yesikwati. Okuhle wukuthi siyawashaya amagoli. “Besidlala nezwe eliqine kakhulu futhi elihlonishwayo, iMorocco. Sisebenzisa izindlela ezahlukene ngoba i-Afcon kayilula neze. Emdlalweni neCape Verde kufanele abadlali bethu baqikelele kakhulu ngoba yizwe eliqinile futhi eliyingozi njengoba
lihlale lisinika ubunzima.
“Ngiyabethemba abadlali bami kulo mqhudelwano ngoba ukuzethemba kuya ngokwenyuka umdlalo nomdlalo okuyinto enhle kakhulu ukuze bakwazi ukuziqophela owabo umlando,” esho.
Isiyonke imidlalo yama-quarter final e-Afcon iqhathwe kanje:KUSASA
NGOLWESIHLANU Nigeria vs Angola 19h00; DR Congo vs Guinea 22h00.
NGOMGQIBELO
Mali vs Cote d’Ivoire 19h00; Cape Verde vs South Africa 22h00.