UNTULI UKHUZA ISIHLAVA SOKUBULAWA KOSOPOLITIKI
USIHLALO we-IFP KwaZuluNatal, okhonjwe yileli qembu ukuthi alimele kwesikandunankulu, uMnu Thami Ntuli, ukhuza isihlava esilokhu sibonakala sikhula, sokubulawa kosopolitiki njengoba kubhekwe okhethweni lukazwelonke.
UNtuli usho lokhu ngemuva kokubulawa kukaMnu Mthokozisi “Nguqunguqu” Sithole wesiyingi iMbabazane, e-Estcourt, ngaphansi kukaMasipala Inkosi Langalibalele.
UNtuli uchaze uSithole njengomholi obezimisele, njengoba ebengunobhala obambile kulesiya siyingi kanti ubulawe ngeledlule ngakubo eWeenen.
UNtuli uthe ukubulawa kosopolitiki kulwa ngqo namalungelo abantu. Ube esenxusa amaphoyisa ukuthi enze umsebenzi wawo.
“Njenge-IFP sinxusa abomthetho ukuba baqinisekise ukuthi benza konke okusemandleni abo ukulwa nalesi sihlava nokubopha labo abathintekayo ekubulaweni kukaSithole.
“Njengeqembu, siyaqonda ukuthi isikhathi esikuso ngesokuthi sibe nokubambana nokubekezelelana singosopolitiki, amalungu omphakathi nezinhlaka ezihlukene,” esho.
UNtuli uthi likhulu kakhulu iqhaza okumele libanjwe ngamalungu omphakathi ekulekeleleni amaphoyisa ukuthi kubanjwe ababulali.
“Ukulahlekelwa ngumholi onjengoSithole kakubuhlungu emndenini wakhe kuphela, kepha ngisho nasemphakathini waseMbabazane, nakithina njengeqembu kubuhlungu.
“Ukubulawa kwakhe kubiza ukuthi sisebenze sonke ngokubambisana ukukhulula lesi sifundazwe ezandleni zezikhohlakali ezibuye zikhombise ukungabakhathaleli abantu bakithi.
“Njengoba sizilile nje, siyazibophezelela ekutheni sizohamba phambili ekukhuthazeni ukuthi imigomo yenkululelo, umthetho nokubumbana siyayilandelela.
“Sinxusa zonke izinhlaka ukuba zibambisane nathi, zisilekelele ekuqinisekiseni ukuthi ukhetho esizoba nalo lunoku-thula,” kusho uNtuli.