BASAGCWELE AMATHAFA ABADUBULA BABULALA UQWEQWE LOMMELI

USAGCWELE amathafa osolwa ngokudubula, abulale ummeli owaziwayo eMtubatuba, esigamekweni esenzeke ngeledlule KwaMsane.

Kubikwa ukuthi amaphoyisa afuna uthuli ababulali bakaMnu Thulani Vusi Madela (39) (osesithombeni), odutshulwe ngeledlule ese-tarven yakhe, KwaMsane.

Akucaci ukuthi yini imbangela yokubulawa kwakhe. Kuthiwa ababulali kabathathanga lutho ngemuva kokumbulala. Kubikwa ukuthi lesi sigameko senzeke kubuka abantu njengo- ba bebehleli kule ndawo yokuci- ma ukoma.

ILANGA lithole ngomthombo walo ukuthi umufi ufike e-tarven, wangena ngaphakathi. Uthi esangweni kunemoto aphambane nayo okusolwa ukuthi ababulali bebekuyona.

Umthombo uthi umufi ungene wayohlala nabanye abangani bakhe abebengaphakathi. “Esengaphakathi, kunowesilisa ongene waqonda kuyena wamdubula. Kuthe noma eselele phansi, wasondela wamdubula okwesibili maqede washaya wachitha,” kusho umthombo.

UMnu Bonga Khumalo ongummeli osebenze iminyaka noMadela, uthi bagqemeke engeqiwa ntwala ngokubulawa kwalolu qweqwe lommeli.

Utshele ILANGA ukuthi uMadela ubezikhandla ngomsebenzi wakhe futhi usekhiqize inqwaba yabammeli abadlule ngaphansi kwesandla sakhe, asebezimele.

“Ngisebenze iminyaka eyisithupha noMadela, sisebenza enkampanini yabameli ebiyaziwa ngokuthi yiScheeper Spies Mdaka Incor. Sisebenze kahle kakhulu kwaze kwaba omunye wabaqondisi uyadlula emhlabeni.

Imizamo yokuthola amalungu omndeni kaMadela kayiphumelelanga kwaze kwashaya isikhathi sokushicilela.

Okhulumela amaphoyisa KwaZulu-Natal, uCol Robert Netshiunda usiqinisekisile lesi sigameko, wathi kuvulwe icala lokubulala. Bekungakaboshwa muntu.