Iyajiya imigomo yoxhaso lweNSFAS
Kuzofanele izitshudeni ezihlomulayo ziphase ngo-60%
SELUZOJULUKELWA uxhaso lwesikhwama semali kahulumeni sezitshudeni ezihlwempu ezikhungweni zemfundo ephakeme. Lokhu kuvezwe nguNgqongqoshe wezeMfundo ePhakeme, uMnu Blade Nzimande, ngeledlule ngesikhathi ethula izinguquko emigomeni yeNational Student Financial Aid Scheme (NSFAS).
Uveze ukuthi kulo nyaka kufanele izitshudeni zazi ukuthi zisebenzela u-60% wamaphuzu okuphasa ezifundweni zazo ukuze zikulungele ukuthola iNsfas ngonyaka ozayo.
AbakwaNsfas babeke umthetho wokuthi isitshudeni esixhaswayo ngesinhlwempu, kodwa esizobe siphase kahle.
Lesi sinqumo siphasiswe emuva kwempi endala phakathi kwaso lesi sikhwama nomkhandlu wezitshudeni emanyuvesi obungafuni ukuba kushintshwe u-50% obugunyaziwe yonke le minyaka.
Ungqongqoshe uthi lolu hlelo luzosiza ukuze kuhlomule izitshudeni ezizimisele ngokushintsha izimpilo zazo ngokuthuthukisa imindeni yazo.
“Izwe lingakhiqiza izifundiswa ezisezingeni eliphezulu uma siqinisa imigomo yokuthi isitshudeni siphase kahle enyuvesi uma sifuna siselekelele enyakeni olandelayo.
“Ngakho-ke izitshudeni kulo nyaka mazisebenzele u-60% kuyaphezulu, uma zifuna nangonyaka ozayo kuvuselelwe izivumelwano zethu nazo zokuxhaswa,” kusho uNzimande.
Uveze ukuthi ezikhungweni zokuqeqeshelwa amakhono, okungamaTechnical Vocational Education and Training (Tvet), kufanele izitshudeni ziphase izifundo ezinhlanu kuyaphezulu.
Uthi ngale migomo, kulwelwa ukuthi imali yalesi sikhwama isebenze ngendlela efanele, kungahlomuli okungabafanele.
Uthi isikhwama sinenkinga yokweswela imali ngenxa yokuthi kunemithetho exegayo.
Utshele ILANGA ukuthi kuningi okwenziwa yilesi sikhwama ukubhekana nale nkinga, okubalwa kukho ukuqoqwa kwemali ehlonyulwe amanyuvesi kungafanele.
“Uphiko iSpecial Investigating Unit, lukwazile ukubamba abantwana abaningi abathole uxhaso kungafanele nyakenye, besebenzisa imininingwane yabazali engesilona iqiniso uma befaka izicelo.
“Selukwazile ukuqoqa u-R700 million ezikhungweni zemfundo ephakeme.”
Uthi enyuvesi yaseMpumalanga sekubuye u-R33 million, eWalter Sisulu University u-R19 million,
University of Johannesburg u-R311 million nasemakolishi ahlukahlukene.
Uthi izitshudeni ngeke zibekwe amacala, kodwa zikweleta lesi sikhwama u-R49 million.
UMengameli weSouth African Union of Students (SAUS) u-Asive Dlanjwa uthi bashaqekile uma sekumenyezelwa lesi sinqumo kungabuyelwanga kubona njengokwesivumelwano.
“Izethulo zakamuva bezivalwa mhla ka-7 ngenyanga edlule, ngakho-ke sibeke izizathu zokuthi sibona u-50% kungafanele ukuba ushintshwe okwamanje ngoba izitshudeni kazikutholi ukwesekwa ngendlela efanele emanyuvesi, okwenza ukuba ziphazamiseke ekuphaseni ngezinga elihle.
“Akusikhona ukuthi sihambisana nokuthi abantu bafunde bengaqedi noma bephase kabi, kodwa sikhala ngezimo izwe elibhekene nazo okwamanje, kasikakulungeli ukubekelwa u-60%,” kusho uDlanjwa.